سینیٹ ءِ چیئرمین سید یوسف رضا گیلانی ءَ پاکستان ءِ زالبولیں فٹبال ٹیم ءَ را فیفا سیریز 2026 ءِ تہ ءَ وشیں سوبمندی ءِ پد ءَ مبارک بات

اسلام آباد۔11اپریل  (اے پی پی): سینیٹ ءِ چیئرمین سید یوسف رضا گیلانی ءَ پاکستان ءِ زالبولیں فٹبال ٹیم ءَ را فیفا سیریز 2026 ءِ تہ ءَ جوانیں سوبمندی ءِ سر ءَ مبارک بات داتگ۔ چیئرمین سینیٹ ءَ گوشت کہ 8-0 ءِ دراجیں سوبمندی راجی زالبولیں کھڈکار آنی محنت، لگن ءُ غیر معمولی ٹیلنٹ ءِ پدریں ثبوت اِنت۔ آئی ءَ گوشت کہ زالبول آنی ٹیم ءَ جوانیں لیب ءُ گوازی پیش کنگ ءَ چہ نہ ایوک ءَ ملک ءِ شرپ ءَ را گیش کتگ بلکینگ ءَ زالبول آنی لیب ءُ گوازی آنی دیمروئی ءِ واستہ نوکیں اُمیت ءُ دلبڈی ھم پیداک کتگ۔ آئی ءَ گیش گوشت کہ لیب ءُ گوازی ءِ پڑ ءَ پاکستانی زالبول آنی گیش بوھوکیں کرد سک دلبڈی ءِ گپ اِنت ءُ اے سوبمندی ءَ چہ نوکیں نسل ھاسیں رنگ ءَ جنک آناں دیم ءَ روگ ءِ واستہ دلبڈی رسیت۔ چیئرمین سینیٹ ءَ اے جزم ءِ درشان کت کہ زالبول آنی لیب ءُ گوازی ءِ دیمروئی ءُ نوکیں ٹیلنٹ ءِ دلبڈی المی انت تانکہ ملک ءَ لیب ءُ گوازی ءِ شوبگ ءَ را گیش مھکم کنگ بہ بیت۔ سید یوسف رضا گیلانی ءَ گوشت کہ فیفا سیریز ءِ تہ ءَ اے سوبمندی آیوکیں وھد ءَ گیش سوبمندی آنی بنیات ثابت بیت ءُ زالبولانی فٹبال ٹیم ءِ اے کارکردگی ءَ چہ زالبول آنی واستہ لیب ءُ گوازی ءِ پڑ ءَ نوکیں راہ پچ بنت۔ آئی ءَ گوشت کہ سرجمیں راج وتی جنک آنی اے سوبمندی ءِ سر ءَ پھر کنت ءُ آوانی وشیں باندات ءِ واستہ نیکیں واھگ آنی درشان ءَ کنت۔