اسلام آباد۔10اپریل (اے پی پی): مزن وزیر محمد شہباز شریف ءَ سعودی عرب ءِ نیمگ ءَ چہ پاکستان ءِ برجاھیں اقتصادی ءُ مالی کمک ءِ توسیپ کنان ءَ گوشت کہ پاکستان ءِ الس ءُ حکومت ھمک گرانیں وھد ءَ وتی سعودی برات ءُ گھار آنی گوما شانہ پہ شانہ اوشتاتگ اَنت۔ پاکستان سعودی عرب ءِ گوما ھمک شعبہ ءَ کمک ءَ را گیش دیمروئی دیگ ءِ واستہ جزمیگ انت۔ …
پاکستان ھمک شوبگ ءَ سعودی عرب ءِ گوما کمک ءَ را گیش دیمروئی دیگ ءِ واستہ جزمیگ اِنت، مزن وزیر شہباز شریف
اسلام آباد۔10اپریل (اے پی پی): مزن وزیر محمد شہباز شریف ءَ سعودی عرب ءِ نیمگ ءَ چہ پاکستان ءِ برجاھیں اقتصادی ءُ مالی کمک ءِ توسیپ کنان ءَ گوشت کہ پاکستان ءِ الس ءُ حکومت ھمک گرانیں وھد ءَ وتی سعودی برات ءُ گھار آنی گوما شانہ پہ شانہ اوشتاتگ اَنت۔ پاکستان سعودی عرب ءِ گوما ھمک شعبہ ءَ کمک ءَ را گیش دیمروئی دیگ ءِ واستہ جزمیگ انت۔ آئی ءَ گوں سعودی وزیر ءِ ھزانگ محمد بن عبداللہ الجدان ءَ گپ ءُ تران کنگ ءَ ات آئی ءَ جمعہ ءِ روچ ءَ اسلام آباد ءِ یک روچی تر ءُ تاب ءِ ساھت ءَ مزن وزیر گس ءَ آئی ءَ گوں گند ءُ نند کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ گند ءُ نند ءَ نائب مزن وزیر ءُ دری کارانی وزیر محمد اسحاق ڈار ءُ سروک دفاعی اُرد آرمی چیف فیلڈ مارشل سید عاصم منیر ھم ھوار بوتگ اَنت۔ سعودی وزیر ءِ ھزانگ ءَ را وش اتک کنان ءَ مزن وزیر ءَ دوئیں مسجد مقدس آنی نگہبان شاہ سلمان بن عبدالعزیز السعود ءُ ولی عہد ءُ مزن وزیر شہزادہ محمد بن سلمان بن عبدالعزیز السعود ءِ واستہ وتی احترام ءُ نیکیں واھشت آنی درشان کت۔ مزن وزیر ءَ ولی عہد محمد بن سلمان ءِ گوما وتی گوستگیں وشیں ءُ دوستانہ ٹیلی فون ءِ گپ ءُ تران ءَ گوں دلگوشی ءَ یات کت۔ آئی ءَ پاکستان ءِ گوما ولی عہد ءِ گھمکی مھمک ءُ سال آنی تہ ءَ پاکستان ءَ را سعودی عرب ءِ برجاھیں اقتصادی ءُ مالی کمک ءِ ساڑات کت کہ ایشی ءَ پاکستان ءِ اقتصادی برجائی ءِ تہ ءَ مزنیں کردے پیلو کتگ۔ مزن وزیر ءَ یک رندے پدا گوشت کہ پاکستان ءِ الس ءُ حکومت ھمک مشکلیں وھد ءَ وتی سعودی برات ءُ گہار آنی گوما شانک ءِ سر ءَ اوشتاتگ ءُ اے دوئیں ملک آنی نیام ءَ یک ابدمانیں بندوک اِنت کہ ولی عہد محمد بن سلمان ءِ سرپرستی ءَ ایشی ءَ را گیش مھکم کنگ بوتگ۔ مزن وزیر ءَ اے گپ ءِ سر ءَ زور پر دات کہ پاکستان سعودی عرب ءِ گوما تجارت ، سرمایہ کاری ءُ اقتصادی دیمروئی ءَ ھوار توامیں پڑ آنی تہ ءَ کمک ءَ را گیش دیمروئی دیگ ءِ واستہ جزمیگ اِنت۔ سعودی وزیر ءِ ھزانگ ءَ مزن وزیر ءِ منت گپت ءُ وتی عزم ءِ پدا زور دات کہ سعودی عرب ولی عہد محمد بن سلمان ءِ وژن ءِ رد ءَ پاکستان ءُ سعودی عرب ءِ نیام ءَ دیریں ، گہتریں ءُ براتی سیادی ءَ را گیش مھکم کنت۔
