پارلیمانی امور ءِ وفاقی وزیر ڈاکٹر طارق فضل چوہدری ءَ شمالی عرب بحر ءَ سوبمندیں ریسکیو آپریشن ءِ ھاتر ءَ پاک بحریہ ءَ را شگر ءُ منت گپت

اسلام آباد۔10اپریل  (اے پی پی): وفاقی وزیر برائے پارلیمانی کار ڈاکٹر طارق فضل چوہدری ءَ شمالی عرب بحر ءَ سوبمندیں ریسکیو آپریشن ءِ ھاتر ءَ پاک بحریہ ءَ را شگر ءُ منت گپت ءُ گوشت کہ اے آپریشن پیشہ وارانہ ءُ انسانیت ءِ واستہ عزم ءِ یک درپشناکیں مثال اِنت۔ یک بیانے ءِ تہ ءَ آئی ءَ گوشت کہ مشکلیں جاور آنی تہ ءَ وھد ءُ پاس ءِ سر ءَ جوانیں رنگ ءَ پسو دیگ ءَ جتاجتائیں ملک آناں سیادی داروکیں 18 مردم آنی جان ءِ رکھینگ یک فخر ءِ کامیابی اِنت، ایشی ءَ چہ پاک بحریہ ءِ مزنیں تک ءِ تربیت، ڈسپلن ءُ ازمت ءِ جزبگ ءِ گواہی اِنت۔ وفاقی وزیر ءَ گوشت کہ پاک بحریہ ءِ افسر ءُ مردین آنی نیمگ ءَ پیش داشتگیں ذمہ واری، ھنر ءُ انسان دوستی سرجمیں راج ءِ واستہ شان ءِ آدینک انت۔ آئی ءَ گیش گوشت کہ آماچیں مردم آناں زوتیں دوا ءُ درمان ءِ آسراتی آنی پجاری اے گپ ءِ درشان اِنت کہ پاکستان جھان ءِ تک ءَ انسانی جان آنی رکھینگ ءِ تہ ءَ سنگین ءُ سرگرمیں کرد پیلو کنگ ءَ اِنت۔ ڈاکٹر طارق فضل چوہدری ءَ گوشت کہ اے رنگیں گامگیج نہ ایوک ءَ راجی عزت ءَ را گیش کن اَنت بلکینگ ءَ دگنیا ءِ دیم ءَ پاکستان ءِ یک جوانیں، زمہ وار ءُ انسان دوستیں اکس ءَ را پدر کن اَنت۔