امریکہ ءُ ایران ءِ گپ ءُ تران ءَ چہ دمگی برجائی ءُ اقتصادی اعتماد ءِ نوکیں راہ پچ بوت کن اَنت، رانا احسان افضل خان

اسلام آباد۔10اپریل  (اے پی پی): مزن وزیر ءِ کوآرڈینیٹر رانا احسان افضل خان ءَ گوشت کہ آیوکیں بجٹ ءَ چہ الس ءَ را ریلیف رسیت، الس آنی سر ءَ ھچ وڑیں گیشیں مالی بار ایر کنگ نہ بیت، امریکہ ءُ ایران ءِ گپ ءُ تران یک جوانیں گامگیج اِنت کہ ایشی ءَ چہ دمگی دلجمی ءُ اقتصادی استحکام ءِ واستہ نوکیں راہ پچ بوت کنت۔ اے ھیالانی درشانی آئی ئَ یک انٹرویو ئِ تہ ئَ کتگ۔ رانا احسان افضل خان ءَ گوشت کہ حکومت ءَ استیں اقتصادی چیلنج آنی گوما گر ءُ چیل بوھگ ءِ واستہ زانتکاریں رنگ ءَ درستیں کفایت شعاری ءِ گامگیج چست کتگ انت ایشی ءَ چہ ایوک ءَ پاکستان ءَ را بلکینگ ءَ سرجمیں دگنیا ءَ را تاوان دیگ بوھگ ءَ انت۔ آئی ءَ گوشت کہ استیں حکومت الس ءِ جیڈھ آں چہ سرجمی ءَ سرپد اِنت ءُ جاور آنی برجائی ءِ واستہ یک ھاسیں رھبند ءِ سر ءَ کار کنگ ءَ اِنت۔ احسان افضل خان ءَ دل یکیمی دات کہ آیوکیں بجٹ ءَ یا آیوکیں لھتیں ماھ آنی تہ ءَ الس ءِ سر ءَ ھچ وڑیں گیشیں بار ایر کنگ نہ بیت۔ آئی ءَ گوشت کہ اقتصادی برجائی ءِ واستہ کوشست بوھگ ءَ انت تانکہ اقتصادی جاور کم کم ءَ گہتر بہ بنت ءُ عام مردم ءَ را ریلیف بہ رسیت۔ برآمدات ءِ تہ ءَ گیشی ءُ این ایف سی ءِ فریم ورک ءَ را مھکم کنگ ءِ ضلورت ءِ سر ءَ زور پر دیان ءَ آئی ءَ گوشت کہ برجمیں اقتصادی دیمروئی ءِ واستہ توامیں سیاسی گل ءُ صوبگ آنی نیام ءَ کمک المی اِنت۔ آئی ءَ امریکہ ءُ ایران ءِ گپ ءُ تران ءِ تہ ءَ پاکستان ءِ جوڑیشت ءِ کرد ءِ سر ءَ زور پر دات ءُ گوشت کہ دمگی امن ءُ اقتصادی برجائی ءِ واستہ گپ ءُ تران یکیں راہ اِنت۔ آئی ءَ امریکہ ءُ ایران ءِ گپ ءُ تران ءَ را آسراتی دیگ ءَ پاکستان ءِ جوڑیشت ءِ کرد ءِ توسیپ کت۔ آئی ءَ گوشت کہ سروکی ءَ مدام گپ ءُ تران، رواداری ءُ جیڈھ آناں پرامنیں رنگ ءَ گیواری ءِ حمایت کتگ کہ اے دمگی تک ءَ ذمہ وار ءُ جوانیں سفارتی رویہ ءِ درشان اِنت۔