1973 ءِ آئین پاکستان ءِ جمہوری پجار ءُ راجی یکوئی ءِ درشان اِنت، سینیٹ ءِ چیئرمین

اسلام آباد۔10اپریل  (اے پی پی): سینیٹ ءِ چیئرمین سید یوسف رضا گیلانی ءَ گشتگ 1973 ءِ آئین پاکستان ءِ جمہوری پجار ءُ راجی یکوئی ءِ آدینک انت۔ اے الس ءِ بنیاتی ھک آنی رکھینگ ءِ زامنی ءَ  دنت۔ آئین ایوک ءَ قانونی سند نہ اِنت بلکیں راجی شعور ءُ جمہوری جزم ءِ عکس اِنت۔ آئین ءِ برتری ءُ قانون ءِ حاکمیت پہ راجی استحکام ءَ المی اِنت۔ اپریل 1973 ءَ راج ءَ یک متفقہ آئین ءِ منظوری ءَ گوں فدراسی ءَ را مھکم کت۔ آئین ءِ روچ ءِ درگت ءَ سینیٹ ءِ سیکرٹریٹ میڈیا ڈائریکٹریٹ ءِ نیمگ ءَ جاڑی بوتگیں کلوہ ءِ تہ ءَ چیئرمین سید یوسف رضا گیلانی ءَ گوشت کہ آئین 1973ءَ صوبہ آنی ھک آنی رکھینگ بوتگ ءُ ادارگ آنی نیام ءَ توازن ءِ جوڑ کنگ بوتگ۔ آ زمانگ ءِ سروکی ءَ ھاسیں رنگ ءَ شہید ذوالفقار علی بھٹو ءَ یک متفقہ آئین جوڑ کت۔ شہید ذوالفقار علی بھٹو ءِ سروکی ءَ ملک ءَ را یک ٹوھیں ءُ موثریں آئینی چارچوب ءِ دات۔ چیئرمین سینیٹ ءَ گوشت کہ آئین ءَ گریب، زالبول ءُ اقلیت آنی ھک آنی ضمانت داتگ، ریاستی اختیارات آنی بھر ءُ بانگ، احتساب ءُ السی نمائندگی ءَ را دل یکیمی کنگ بوتگ ءُ پارلیمنٹ موثر ءُ شفافیں کانود سازی ءِ واستہ جزم اِنت۔ چیئرمین سینیٹ ءَ گوشت کہ جوانیں سفارتکاری ءَ چہ جھان ءِ تک ءَ پاکستان ءِ جوانیں امیج ءَ را پدر کتگ۔ سیاسی گل راجی مفاد ءُ آئین ءِ پابندی ءِ ھاتر ءَ یکوئی ءَ را اولیت بہ دنت۔ سید یوسف رضا گیلانی ءَ گوشت کہ ورنا آئین ، ھک ءُ جمہوری ذمہ واری آنی بابت ءَ سرپد بہ بنت ۔ یک سرپدیں ورنائیں نسل پاکستان ءِ رژنائیں باندات ءِ ضمانت اِنت۔