وزیراعظم نا دوراندیش سرکڑدہ ئی ٹی پاکستان جہانی سفارتکاری ٹی گچین کڑد ادا کرے، رانا تنویر حسین

اسلام آباد۔ 08 اپریل (اے پی پی ) بنجائی وزیر قومی غذائی رکھ و پٹ وپو ل رانا تنویر حسین ایران و امریکہ نا نیام اٹ بے چیٹی ٹی کمتی و جنگ بندی نا پڑو نا خیرمقدم ءِ کرساپارینے کہ وزیراعظم شہباز شریف نا دوراندیش سرکڑدہ ئی ٹی پاکستان جہانی سفارتکاری ٹی گچین، متوازن و باوقار ءُ کڑد اس اداکرینے۔ چارشنبے نادے آ جاری بیان اٹی اوپارے کہ ایران ۔ امریکہ بے چیٹی ٹی کمتی پاکستان نا سنجیدہ ، سوگو و بھرمی سفارتی کوشست آتا پیدوار درشانی ءِ۔ قومی سرکڑدہ غاتا حکمت، تدبر و وخت آ فیصلہ غاک ڈیہہ ءِ اسہ بھلو تنکی سے آن رکھ تخار۔ رانا تنویر حسین نا رداٹ فیلڈ مارشل عاصم منیر نا کسبی بصیرت و گچین حکمت عملی علاقائی سوگوی نا مون آ دننگ اٹ اہم کڑد ادا کرینے، ہرانا مثبت اثر مچ آ ڈیہہ آ تمنگ ءِ۔ بنجائی وزیر پارے کہ اسلام آباد نا ساڑی آ سفارتی پیش رفت ڈیہہ اٹی دیرپا امن نا کنڈآ اسہ اہم ءُ مزل اسے ، وخت اس کہ پاکستان نا متوازن و اصولی خارجہ پالیسی جہانی کہول آ پت اٹی پدریسہ ودکی کننگ ءِ۔ اومستی پارے کہ قومی سرکڑدہ غاتا مدبرانہ فیصلہ غاک نئے بیرہ پاکستان نا شرف ءِ بڑز کرینو بلکن ملک انا جہانی تشخص ءِ ہم پین سوگو کرینو۔ پاکستان اسہ وار ولدا امن، سوگوی و تین پہ تینی کمکاری نا مون آ دننگ نا عزم انا عملی درشانی ءِ کرینے۔ رانا تنویرحسین پارے کہ جہانی کہول آ پاکستان نا مثبت و تعمیری سفارتکاری ءِ پبی پذیرائی دوئی مننگ ءِ، و پاکستان آخبت ہم علاقائی ہم گرنچی، شونداری و پائیدار امن نا مون آ دننگ اٹ تینا فعال کڑد ءِ برجاتخک۔