بنجائی وزیر توانائی سردار اویس احمد خان لغاری تون پاکستان اٹی کینیڈا نا ہائی کمشنر نا اوڑدہی

اسلام آباد۔ 08 اپریل (اے پی پی ) بنجائی وزیر توانائی سردار اویس احمد خان لغاری تون پاکستان اٹی کینیڈا نا ہائی کمشنر طارق علی خان چارشنبے نادے آ داڑے اوڑدہی کرے۔ اوڑدہی ٹی ہڑتوم آ کنڈآتا تعلقداری، توانائی نا بشخ اٹی کمکاری و زرکاری نا گمان تیا ہم گپ وتران کننگا۔ اوڑدہی ٹی کینیڈا نا ہائی کمشنر پارے کہ امریکہ۔ ایران بے چیٹی نا رداٹ جنگ بندی نا مون آدننگ و سفارتی پیش رفت اٹی پاکستان نا مثبت و فعال کڑد انا ستاءِ کینہ، پاکستان نا مثبت کڑد آ حکومتِ پاکستان نا منت واری ءِ ہرفنہ۔ دااومیت ہم کینہ کہ سلاہ ئی مذاکراتی عمل اٹی ہم پاکستان گچین کڑد ادا کیک۔ بنجائی وزیر داوخت آ کینیڈین حکومت آ زور شاغا کہ او ڈیہہ اٹی پائیدار امن نا قیام و مذاکرات نا مون آدننگ اٹ تینا فعال و تعمیری کڑد ءِ ہم ادا کے۔ ترجمان پاور ڈویژن نا رداٹ توانائی نا بشخ انا بابت گپ وتران کرسا بنجائی وزیرپارے کہ تدوک آ سال پاکستان تینا انرجی مکس اٹی کم و ود 55 درسد بشخ ساف توانائی آن دوئی کرے، ہراکہ حکومتی پالیسی تا سہی سمت انا عکاسی ءِ کیک۔ اوپارے کہ ساڑی آ آزموندہ غاتے مون آ تخسا حکومت بجلی نا بشخ ءِ غیرمتوقع حالیت آتیان رکھ جوڑ کننگ کن گچین و دیرپا گام گیج کننگ ءِ، ہرافتے ٹی پن بجلی نا مون آدننگ ہم اوار ءِ تانکہ نظام اٹی پین پائیدار و کم خڑچ بجلی اوار کننگ مرے۔ اومستی پارے کہ حکومت درآمدی کولا غا سیبو ءِ کم کننگ کن سنجیدہ گام گیج کننگ ءِ و داچرجوئی ٹی درآمدی کولا آن چلینگوک آ پاور پلانٹ آتے ہندی کولاغا گدریفنگ نا گمان تا سرجمی اٹ جاچ ءِ ہلنگ انگ ءِ۔