وزیراعظم شہباز شریف نا ایران و امریکہ تون اوار فریق آتا کنڈآن دے ٹک نیامی و خلیج اٹی دمدستی جنگ بندی آ امنائی نا خیرمقدم

اسلام آباد۔ 08اپریل (اے پی پی ) وزیراعظم محمد شہباز شریف ایران و امریکہ تون اوار فریق آتا کنڈآن دے ٹک نیامی و خلیج اٹی دمدستی جنگ بندی آ امنائی نا خیرمقدم ءِ کرسا جمعہ نادے آ ہڑتوم آملک آتا ڈل آتے جھیڑہ غاتا حتمی و جوان ایسری کن پین مذاکرات کن اسلام آباد آ بننگ نا سلہ خلکنے۔ چارشنبے نا سہب آ ’’ایکس‘‘ آ تینا تاریخ ساز کلہو ہرانا مچ آ دنیا انتظار ءِ کریکہ، ٹی وزیراعظم پارے کہ اودے بے کچ عاجزی اتون دا پڑو کرسا خوشی مننگ ءِ کہ ایران و امریکہ تینا سیوتی تتون اواری اٹ دمدستی جنگ بندی آ امنا کرینو ہرا لبنان تون اوار ہر جاگہ غا دمدستی وڑاٹ نافذ العمل مریک۔ وزیراعظم پارے ہ او دا دانشمندانہ گام انا خیرمقدم ءِ کرسا ہڑتوم آملک آتا سرکڑدہ غاتا است انا ہب اٹ منت واری ءِ ہرفک۔ وزیراعظم ایران و امریکہ نا ڈل آتے 10 اپریل  جمعہ نادے آ غٹ جھیڑہ غاتا حتمی  و جوان ایسری کن پین مذاکرات کن اسلام آباد بننگ نا سلہ ءِ خلاس پارے کہ فریق آک غیرمعمولی بصیرت ، دانش و فہم و فراست نا درشانی ءِ کرینو و امن و سوگوی کن تعمیری وڑاٹ پدریسہ رابطہ ٹی رہینگانو۔ وزیراعظم دا اومیت نا درشانی ءِ کرے کہ اسلام آباد مذاکرات نا کمک اٹ پائیدار امن نا دوئی کننگ ممکن مریک۔ اوپارے کہ نن بروک آ دے تیٹی دنیا ءِ پین خوشخبری بِنفنگ نا خواہندار اُن۔ داکان مست سے شنبے نا نن ’’ایکس‘‘ آ تینا کلہو اٹی وزیراعظم محمد شہباز شریف دے ٹک نیامی ٹی جنگ انا چٹفنگ و امن کن سفارتی کوشست آتا باآور مننگ نا اومیت ظاہر کرسا صدر ٹرمپ  آن مہلت اٹی اِراہفتہ نا ودکی ، ایران آن اِرا ہفتہ کن آبنائے ہرمز ءِ ملنگ و غٹ متحارب فریق آتیان اِراہفتہ نا جنگ بندی نا خواست کریسس۔ اوتینا کلہو نا کمک ات دنیا ءِ معلومدار کریسس کہ دے ٹک نیامی ٹی برجاجنگ انا پرامن ایسری کن کروک آ سفارتی کوشست آک پدریسہ، سوگو وگچین وڑاٹ مون آ ہِننگ ءُ و اوفتا زوت پبی نتیجہ اسکان سرمننگ نا گمان ارے۔ وزیراعظم سفارت کاری نا سرسہبی کن امریکی صدر ٹرمپ آن خواست کریسس کہ او مہلت اٹی اِراہفتہ نا ودکی کے۔ اوایران آن ہم خواست کریسس کہ او خیرخواہی نا جوزہ نا رداٹ آبنائے ہرمز ءِ اِراہفتہ کن ملے۔ اوپاریسس کہ نن غٹ متحارب فریق آتیا زور شاغنہ کہ او ہرجاگہ اِراہفتہ کن جنگ بندی کیر تانکہ سفارتی کوشست آتے جنگ انا حتمی چٹفنگ اسکان سرمننگ نا موقع ملنگ کے ہرا ڈیہہ اٹی دیرپاامن و سوگوی نا فائدہ غاتیٹی ءِ۔ وزیراعظم نا داپڑو آن پد دے ٹک نیامی ٹی جنگ انا سلنگ نا گمان ودی مسوسس و مچ آد نیا نا خنک داپڑو آ ئسر۔