آخری بال ءِ سرا شکست سک باز  دردناک انت، ٹیم ءَ داں گڈی ءَ سک جنگ کت ءُ سوبمندی ءِ ھاترا وتی سرجمیں توان دات، فاطمہ ثنا

کولمبو۔11فروری  (اے پی پی): جنوبی افریقہ ءِ ھلاپ ءَ اولی ٹی ٹوئنٹی میچ ءَ یک دلکشیں مقابلہ ءَ پد پاکستان ءِ زالبولیں کرکٹ ٹیم ءِ کپتان فاطمہ ثنا ءَ گشتگ کہ گڈی بال ءِ سر ءَ شکست   سک باز   دردناک انت بلے ٹیم ءَ تاں گڈی ءَ سک جنگ کتگ ءُ سوبمندی ءِ ھاتر ءَ وتی سرجمیں وس ءُ واک داتگ۔ میچ ءَ پد تران کنان ءَ فاطمہ ثنا ءَ گشتگ کہ لھتیں المی ئیں ساھتاں جوانیں کارکردگی ءِ ضلورت بوتگ، اگاں ما آ ساھتاں گیشتر جوانیں رنگے ءَ گوازی کتگ ات گڑا آسر دگہ رنگے ءَ بوت کنت۔ آئی ءَ من اِت کہ جنوبی افریقہ ءَ دباؤ ءِ تہا جوانیں لیب کتگ ءُ کریڈٹ مخالف ٹیم ءَ را رسیت۔ زالبولانی راجی ٹیم ءِ کپتان ءَ گشتگ کہ بالنگ یونٹ ءَ جوانیں واپسی کتگ ءُ میچ ءَ را یک دلکشیں پڑ ءَ سر کتگ، البت گڈی اوور ءَ قسمت آئی ءِ نیمگ ءَ نہ بوتگ۔ آہاں گشتگ کہ آہاں بیٹنگ ءِ تہا جوانیں بندات کتگ بلے میانجی اوورز ءِ تہا وقفہ وقفہ ءَ وکٹ ٹیم ءِ ھاتر ءَ گرانیں ثابت بوتگ۔ فاطمہ ثنا ءَ وتی ٹیم ءِ باڈی لینگویج ءُ جنگی جذبہ ءِ توسیپ کتگ ءُ گشتگ کہ من ءَ کھڈکارانی شوق ءُ جزم ءِ سر ءَ فخر اِنت۔ آئی ءَ وتی اے جزم ءِ درشانی کت کہ اے سیریز انگت ءَ ھلاس نہ بوتگ، ٹیم آیوکیں میچ ءَ سرجمیں واتر کنت ءُ وتی ردی آں چہ دربرگ ءَ پد نوکیں جوش ءُ جزبگ ءَ گوں میدان ءَ داخل بیت۔ آئی ءَ کرکٹ ءِ شائقین آنی منت گپت ءُ گوشت کہ ٹیم ءِ واستہ شائقین آنی کمک سک باز المی انت ءُ آ ٹیم ءَ را مایوس نہ کن انت۔