ہارون اختر خان ءَ موبائل ءُ الیکٹرانک ڈیوائس جوڑ کنگ ءِ پالیسی ءِ بابت ءَ مزن تک ءِ دیوان ءِ سروکی

اسلام آباد۔1جنوری  (اے پی پی): صنعت ءُ پیداوار ءِ بابت ءَ مزن وزیر ءِ ھاسیں کمکار ہارون اختر خان ءِ سروکی ءَ موبائل ءُ الیکٹرانک ڈیوائس مینوفیکچرنگ پالیسی ءِ ھوالگ ءَ مزن تک ءِ دیوان برجم دارگ بوت، ایشی ءِ تہ ءَ صنعت ءُ پیداوار ءِ سیکرٹری صنعت ءُ پیداوار ءِ چیف ایگزیکٹو صافی انجم۔ منصور ءُ موبائل فون جوڑ کنوکیں کمپنیانی نمائندگاں بہر زرتگ ات۔ گند ءُ نند ءِ ساھت ءَ موبائل ءُ الیکٹرانک ڈیوائس مینوفیکچرنگ پالیسی 2026 ءَ چہ 2033 ءِ سر ءَ بریفنگ دیگ بوت۔مزن وزیر ءِ ھاسیں کمکار ہارون اختر خان ءَ گوشت کہ اے پالیسی ءِ تہ ءَ درستیں سٹیک ہولڈر آنی گوما مزنیں شور ءُ سلاھ ءَ پد جوڑ کنگ بوتگ ءُ ایشی ءِ تہ ءَ موبائل فون، الیکٹرانک لیپ ٹاپ ءُ دگہ پالیسی ھوار اَنت۔ آئی ءَ گوشت کہ اے گامگیج پاکستان ءِ واستہ سادہ اسمبلی ءَ چہ سرجمیں مینوفیکچرنگ ءَ تاں یک ھاسیں ءُ ڈھانچہ ءِ مٹ ءُ بدلی ءِ نشانی اِنت ءُ ملک ءَ مینوفیکچرنگ ءُ ایکسپورٹ ءِ دیمروئی ءِ واستہ ناگزیر اِنت۔ آئی ءِ رد ءَ اے گامگیج ءِ چیر دستی ءَ پاکستان ءَ گلوبل برانڈز مینوفیکچرنگ ءِ نیمگ ءَ راجیگ کنگ بنت، وھدیکہ لوکل برانڈز ءَ را ھم وتی مقابلہ ءِ توان ءَ را گیش کنگ ءِ موہ دیگ بنت، وھدیکہ کاروباری رد ءَ مینوفیکچرنگ ءِ واستہ ھاسیں ٹارگٹ ءُ ٹائم لائن ھم ٹھینگ بوتگ۔ ہارون اختر خان ءَ گیش گوشت کہ اسمبلی ءَ چہ مینوفیکچرنگ ءَ رھادگ بوھگ نوں آستانہ ءِ سر ءَ اِنت ءُ ملک ءِ اقتصادی دیمروئی ءِ براہ راست اے بدلی ءِ سر ءَ بندوک اِنت۔ انجینئرنگ ڈویلپمنٹ بورڈ ءِ رد ءَ اے گامگیج ءِ مول ءُ مراد 2033 ءَ تاں موبائل فون ءِ تہ ءَ 50درسد لوکلائزیشن ءِ ھاترا اِنت وھدے کہ اے گامگیج ءِ چیر دستی ءَ 70درسد ای ویسٹ ریکوری ءِ ٹارگٹ ھم ایر کنگ بیت کہ ایشی ءَ چہ چاگرد ءِ سر ءَ جوانیں اثر کپ ایت۔ آئی ءَ گوشت کہ اے پالیشی ءِ چیر دستی ءَ 50ہزار ہنرمندیں افرادی قوت جوڑ کنگ بیت ایشی ءِ تہ ءَ 15ہزار ھاسیں ہنرمندیں زانتکار ھوار اَنت ءُ اے موبائل ءُ الیکٹرانک ڈیوائس مینوفیکچرنگ ءِ اے پالیشی زوت مزن وزیر ءِ دیما پیش کنگ بیت۔