سرمایہ کاری بورڈ ءِ وفاقی وزیر قیصر احمد شیخ ءَ نوکیں سال ءِ بندات ءِ رد  ءَ  راج ءَ را مبارک بات داتگ

اسلام آباد۔1جنوری  (اے پی پی): سرمایہ کاری بورڈ ءِ وفاقی وزیر قیصر احمد شیخ ءَ نوکیں سال 2026 ءِ بندات ءِ سر ءَ راج ءَ را مبارک بات دیگ ءِ وھد ءَ گوشت کہ نوکیں سال سرمایہ کاری، اقتصادی برجائی ءُ مھکمیں  دیمروئی ءِ واستہ یک موڑ ءِ رنگ ءَ ثابت بیت، حکومت سرمایہ کار آناں یک سازگاریں گامگیج ءِ پھجارینگ ءَ انت۔ سرمایہ کاری ءِ عمل ءَ را آسراتی بہ دنت۔ پنچ شمبے ءِ روچ ءَ بورڈ آف انویسٹمنٹ ءِ نیمگ ءَ جاڑی بوتگیں کلوہ ءِ تہ ءَ وفاقی وزیر قیصر احمد شیخ ءَ گوشت کہ شفاف کارروائی ءُ یک ونڈو آپریشن ءِ سبب ءَ سرمایہ کاری ءِ تہ ءَ گیشی بوھگ ءَ اِنت۔ آئی ءَ گوشت کہ پاکستان جھان ءِ سرمایہ کاری ءِ نقشہ ءِ سر ءَ یک دلکشیں منزل ءِ رنگ ءَ سہرا بوھگ ءَ انت ءُ میاں اوستمانی سرمایہ کار پاکستان ءِ سر ءَ دل یکیمی ءِ درشان کنگ ءَ انت۔ قیصر احمد شیخ ءَ گوشت کہ توانائی، آئی ٹی، کشت ءُ کشاری، صنعت ءُ انفراسٹرکچر ءَ ھوار جتا جتائیں شوبگ آنی تہ ءَ سرمایہ کاری ءِ موہ است انت۔ وفاقی وزیر ءَ گیش گوشت کہ ھاسیں اقتصادی زون آنی تہ ءَ سرمایہ کاری ملک ءِ دیمروئی ءِ تہ ھاسیں کرد ءَ پیلو کنت۔ درملکی سرمایہ کاری ءَ چہ معیشت برجائی بیت ءُ روزگار ءِ موہ گیش بنت۔ قصری احمد شیخ ءَ گوشت کہ راجی دیمروئی ءِ تہ ءَ جندی شوبگ ھاسیں شریک انت۔ ملک ءِ ورنا آبادی ءُ اسٹریٹجک لوکیشن پاکستان ءِ مزنیں طاقت انت۔ وفاقی وزیر قصری احمد شیخ ءَ گوشت کہ وشھال ءُ مھکمیں پاکستان ءِ دیمروئی مئے یکجائی عزم اِنت، سرجمیں ادارگ سرمایہ کاری ءُ اقتصادی برجائی ءِ دیمروئی ءِ واستہ یکجائی ءَ کار کنگ ءَ برجاہ دار اَنت۔ قصری احمد شیخ ءَ گوشت کہ بورڈ آف انویسٹمنٹ سرمایہ کاری ءِ دیمروئی ءُ راجی اقتصادی دیمروئی ءِ واستہ جزمیگ انت۔