سعودی سفیر ءَ مزن وزیر شہباز شریف ءَ گوں گند ءُ نند کت، دیریں براتی سیادی ءَ را گیش گہتر کنگ ءِ مھکمیں عزم ءِ درشان

اسلام آباد۔ 31دسمبر (اے پی پی) : مزن وزیر محمد شہباز شریف ءَ پاکستان ءُ سعودی عرب ءِ نیام ءَ دو نیمگی سیادی آنی سر ءَ دل یکیمی ءِ درشانی کتگ ءُ دیریں براتی سیادی ءَ را گیش گہتر کنگ ءِ واستہ وتی مھکمیں جزم ءِ پدر کنگ ءَ انت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ گوں پاکستان ءَ سعودی سفیر نواف بن سعید احمد المالکی ءَ چار شمبے ءِ روچ ءَ مزن وزیر گس ءَ گند ءُُ نند کت۔ مزن وزیر ءَ دو شریک مسجد ءِ نگہبان شاہ سلمان بن عبدالعزیز السعود ءُ سعودی عرب ءِ مزن وزیر ءُ ولی عہد محمد بن سلمان بن عبدالعزیز السعود ءِ واستہ نیکیں واھگ آنی درشان کت۔ آئی ءَ پاکستان ءُُ سعودی عرب ءِ نیام ءَ دو نیمگی سیادی آنی سر ءَ دل یکیمی ءِ درشان کت ءُُ دوئیں ملک آنی نیام ءَ دیریں براتی سیادی ءَ را گیش گہتر کنگ ءِ واستہ وتی مھکمیں جزم ءِ سر ءَ زور پر دات۔ آئی ءَ پاکستان ءِ کمک ءِ پد ءَ ولی عہد محمد بن سلمان ءِ شگر ءُُ منت گپت کہ ایشی ءَ چہ دوئیں ملک یکجائی ءَ را گیش نزیک کتگ اَنت۔ مزن وزیر ءَ سال ءِ تہ ءَ ولی عہد محمد بن سلمان ءِ گوما گند ءُُ نند ءِ یات کت کہ آ سک باز پائدگ مند بوتگ ءُُ پاکستان ءُُ سعودی ءِ دو نیمگی سیادی ءَ را نوکیں بالاد ءَ سر کنگ ءَ مزنیں کرد پیلو کتگ۔ آئی ءَ سعودی عرب ءِ ضلورت ءِ وھد ءَ پاکستان ءِ برجاھیں کمک ءُُ دمگی امن ءُُ ایمنی ءِ دیمروئی ءِ تہ ءَ آئی ءِ جوڑیشت ءِ کرد ءِ ھم ساڑات۔ گند ءُ نند ءَ انوگیں دمگی ءُ جھان ءِ دیمروئی آنی سر ءَ ھم گپ ءُ تران کنگ بوت۔ مزن وزیر ءَ گپ ءُ تران ءُ سفارتکاری ءِ وسیلگ ءَ امن ءُ ایمنی ءِ برجائی ءِ ضلورت ءِ سر ءَ زور پر دات۔ سعودی سفیر ءَ شاہ سلمان بن عبدالعزیز السعود ءُ ولی عہد محمد بن سلمان ءِ نیمگ ءَ مزن وزیر ءَ را مبارکی کلوہ دات۔ آئی ءَ سعودی عرب ءِ بادشاہی ءِ واھشت ءِ سر ءَ زور پر دات کہ آ پاکستان ءِ گوما وت مہ وتی مفاد ءِ درستیں پڑ آنی تہ ءَ کمک ءَ را گیش بہ کنت۔