بھارتی اسپانسر بلوچستان ءَ زوراکی ءِ شنگ ءُ تالان کنگ ءُ دیمروئی ءِ راہ ءَ بند کنگ ءَ اَنت، آھانی نا شریں ارادہ سیکورٹی فورسز ءِ ترندیں کارروائیانی وسیلگ ءَ ناکام کنگ بنت، فیلڈ مارشل سید عاصم منیر

راولپنڈی۔31دسمبر  (اے پی پی):  چیف آف آرمی اسٹاف ءُ چیف آف ڈیفنس فورسز فیلڈ مارشل سید عاصم منیر ءَ گشتگ کہ بھارتی اسپانسر (پراکسی) بلوچستان ءَ زوراکی ءِ شور کنگ ءُ دیمروئی ءِ راہ ءَ بند کنگ ءَ انت، آہانی نا شریں ارادہ سیکورٹی فورسز ءِ ترندیں کارروائی آنی وسیلگ ءَ ناکام کنگ بنت تانکہ صوبہ ءَ را ناشرکاری ءَ چہ آجو کنگ بہ بیت۔ آئی ایس پی آر ءِ رد ءَ فیلڈ مارشل سید عاصم منیر ءَ بلوچستان ءِ بابت ءَ جنرل ہیڈ کوارٹر ءَ برجم داشتگیں ہژدہمی راجی ورکشاپ ءِ بہر زوروکاں گوں تران کنگ ءَ ات۔ ورکشاپ ءِ فوکس بلوچستان ءِ چاگردی ءُ اقتصادی دیمروئی ءُ پاکستان ءِ واستہ ایشی ءِ اسٹریٹجک ارزشت ءِ سرا چار ءُ تپاسی کنگ بوتگ۔ فیلڈ مارشل ءَ وتی کلوہ ءِ تہ ءَ بلوچستان ءِ الس ءِ دلیری ءُ راج دوستی ساڑاتگ ءُ پاکستان ءِ وشھالی ءُ دیمروئی ءِ واستہ بلوچستان ءِ ارزشت ءِ سر ءَ زور پر داتگ ۔ آئی ءَ وفاقی ءُ صوبائی حکومت آنی نیمگ ءَ چہ چست کتگیں جامع گامگیج آناں ساڑات ءُ صوبہ ءِ چاگردی ءُ اقتصادی جاور آناں گہتر کنگ ءُ ایشی ءِ مزنیں اقتصادی توانائی ءَ را الس ءِ نفع ءِ واستہ کارمرد کنگ ءِ مول ءُ مراد ءِ سر ءَ زور پر دات۔ آئی ءَ سول سوسائٹی ءِ دیمروئی کرد ءِ ھاسیں رنگ ءَ پروپیگنڈا ءِ پدر کنگ ءُ پائیدار دیمروئی ءِ ھاترا آئی ءِ ھاسیں کرد ءِ سر ءَ چمشانک دیگ ءِ کوشست آناں ساڑات۔ آئی ءَ اے گپ ءِ سر ءَ زور پر دات کہ واسڈ سیاسی ایجنڈا آناں رد کنگ المی اِنت تانکہ بلوچستان ءِ آیوکیں وھد دراجیں مدت ءِ وشھالی ءِ واستہ جوڑ کنگ بہ بیت۔ فیلڈ مارشل ءَ سیکورٹی چیلنج آنی حوالہ ءَ گشتگ کہ بھارت ءِ حمایت کتگیں پراکسی بلوچستان ءَ زوراکی ءِ سبب جوڑ بوھگ ءُ دیمروئی ءِ راہ ءَ بند کنگ ءَ انت۔ آئی ءَ اے جزم ءِ پدا زور دات کہ آھانی ناپاکی ءِ منصوبگ سیکورٹی فورسز ءِ نیمگ ءَ چہ ترندیں گامگیج آنی وسیلگ ءَ ناکام کنگ بنت تانکہ صوبہ ءَ را ناشرکاری ءُ ناامنی ءَ چہ آجو کنگ بہ بیت۔ فیلڈ مارشل ءَ دمگی امن ءُ ایمنی ءِ واستہ پاکستان ءِ عزم ءِ پدا پدر کنان ءَ اے گپ پدر کت کہ پاکستان ءِ سرزمین ءِ یکوئی ءِ ھرچ وڑیں خلاف ورزی ، چہ براہ راست یا بالواسطہ ءَ را لائکیں ءُ موثریں پسو ءِ گوما دیم پہ دیم کنگ بیت۔ پاکستان ءِ سلاہ بندیں اُرد وتی شہری آنی جان ءُ مال ءُ گہبودی ءِ رکھینگ ءِ واستہ جزمیگ انت۔ ورکشاپ ءِ آسر ءَ جُست ءُ پُرس ءِ دیوان بوت کہ ایشی ءِ تہ ءَ فیلڈ مارشل ءَ بھر زوروکیں مردمانی جست ءُ پرس ءِ پسو دات ءُ بلوچستان ءِ دیمروئی ءُ ایمنی ءِ واستہ برجاہیں کوشست آنی بابت ءَ گیشیں سرپدی دات۔