اسلام آباد۔14جولائی (اے پی پی) پاکستان اقوام متحدہ غا زورشاغانے کہ او کشمیر آن بابت تینا قرارداد آتیا عملدرآمد کرفے۔ داخیال آتا درشانی ئِ دفترخارجہ نا ترجمان محمد نفیس زکریا پنچ شنبے آ ہفتہ وار پریس بریفنگ نا وخت آ جتا سوج آتا ورندی ئِ ترسا کرے۔ اوپارے کہ کشمیر نا تنازعہ بین الاقوامی وڑاٹ تسلیم شدہ ئِ۔ بھارت نا کنڈآن کشمیر ئِ داخلی معاملہ گوندنگ اقوام متحدہ نا سلامتی کونسل نا قرارداد آتا خلاف ورزی ئِ۔ پاکستان بھارت تون کشمیر تون اوار غٹ تنازعہ غاتے مذاکرات نا ذریعہ ایسر کننگ خواہک انتئے کہ جنگ ہچ ئُ ویل اسینا ایسری اف۔ کشمیر نا ویل ئِ اقوام متحدہ تون اوار غٹ جہانی فورم تیا گچین وڑاٹ چست کرینن، بھارت مقبوضہ کشمیر اٹی انسانی حق انا سنگین خلاف ورزی تے ٹی اوارے۔ ہنداخاطران او سلامتی کونسل نا رکنیت نا اہلیت ہی تخپک۔ کشمیری تینا آجوئی کن جہد کننگ ئُ۔ بھارتی فورسز آک مقبوضہ کشمیر اٹی ریاستی دہشت گردی ٹی اوڑدہ ئُ ، اونا کارندہ غاک ایمبولینسز و ہسپتال آتیا جلہو کننگ ئُ۔ اوغانستان اٹی امن و سوگوی پاکستان نا تینا مفاد اٹی ئِ۔ اوغان صدر نا منفی بیان تیان ہمو خلقت آتے فائدہ مریک ہرا اوغانستان اٹی امن و سوگوی خواپسہ۔ 2013ءآن گڈ پاکستان اٹی ڈرون جلہو آتے ٹی کمتی بس ، پاکستان ہمیش ڈرون جلہو آتا مذمت ئِ کرینے۔ برخلاف جنگ اٹی پاکستان نا قربانی تے دنیا امنا کرینے۔ مقبوضہ کشمیر اٹی ساڑی آ بھارتی ظلم انا بابت اسہ سوج اسینا ورندی ئِ ترسا ترجمان پارے کہ کشمیر نا ویل بین الاقوامی وڑاٹ تسلیم شدہ تنازعہ اسے۔ کشمیر نا ویل انا ایسری اقوام متحدہ نا زمہ واری ئِ وخت اس کہ پاکستان کشمیر نا ویل ئِ اقوام متحدہ تون اوار غٹ جہانی فورم تیا گچین اٹ اٹ چست کرینے۔ ترجمان پارے کہ کشمیر آجنگ ہم کننگانے ولے نن پہہ مرینہ کہ جنگ دا ویل انا ایسری اف، پاکستان بھارت تون کشمیر تون اوار غٹ ایسر نا چاری ویل آتے مذاکرات نا ذریعہ ایسر کننگ خواہک۔ ترجمان پارے کہ جہانی برادری مذاکرات کن بھارت آ زورشاغے۔ ترجمان پارے کہ طاقت نا زور آ کشمیری الس نا حق خودارادیت آن نہ من مننگ کپک۔ بھارت نا کنڈآن کشمیر ئِ داخلی معاملہ پاننگ اقوام متحدہ نا قرارداد آتا خلاف ورزی ئِ کشمیر نا تنازعہ بین الاقوامی تسلیم شدہ ویل اسے۔ اوغان صدر نا ساڑی آ بیان تا بابت اسہ سوج اسینا ورندی ئِ ترسا ترجمان پارے کہ نن وا روار واضح کرینن کہ منفی بیانات اوغانستان و ڈیہہ ٹی امن و سوگوی نا بحالی ٹی کمکار مننگ کپسہ۔ انسداد دہشت گردی و شدت پسندی نا بابت پاکستان نا کوشست و قربانی تا جہانی کہول آ ستاکننگانے۔ پاکستان و اوغانستان نا نیام اٹ ہم آہنگی ئِ مون آ دننگ نا گرج ئِ۔ اوغانستان اٹی امن و سوگوی پاکستان نا تینا مفاد اٹی ئِ۔ پاکستان ڈیہہ آن دہشت گردی و شدت پسندی نا چٹفنگ و اوغانستان اٹی امن کن پرعزم ئِ۔ ترجمان پارے کہ ذلمے خلیل زاد نا بیان آتے سنجیدگی اٹ ہلنگ مفک۔ پاکستان و امریکہ انسداد دہشت گردی نابرخلاف کوشست آتے ٹی اہم پارٹنرز ئُ۔ پاکستان دہشت گردی آن اخس زہمی مسنے پین اسہ ملک اس ہم داخہ در زہمی متنے ۔ انسداد دہشت گردی نا بابت پاکستان نا عزم آ ہچ ئُ سوج اس چست کننگ مفک۔ اسہ سوج اسینا ورندی ئِ ترسا ترجمان پارے کہ بھارت مقبوضہ کشمیر اٹی انسانی حق انا خلاف ورزی تے ٹی اوڑدہ مرساکرینے ہنداخاطران اقوام متحدہ نا کانود نا رداٹ سلامتی کونسل نا رکنیت نا ہلیت تخپک۔ ترجمان اوغانستان اٹی نیٹو نا کنڈآن سرجزآتے برجاتخنگ نا بابت اسہ سوج اسینا ورندی ئِ ترسا پارے کہ پاکستان ہر ہمو گام انا خیرمقدم ئِ کیک ہراڑآن اوغانستان اٹی امن و سوگوی قائم مرے۔ ترجمان پارے کہ سارک سروک دیوان شیڈول نا رداٹ اینخو نا سال اسلام آباد اٹی اڈ ہلیک ہراٹی باسک ملک آتا غٹ سروک آک شرکت نا باوری ترفینو۔ پاکستان و بھارتی کوسٹ گارڈز نا اِرا دے ئی دیوان چارشنبے آ اسلام آباد اٹ اڈ ہلک۔ سمندری دنگ انا غٹ آن زیات خلاف ورزی بھارت کننگ ئِ۔
