اسلام آباد۔27جون (اے پی پی): مزن وزیر محمد شہباز شریف ءَ گوشت کہ حکومت لیب آنی ھمک پڑ ءَ میرٹ ءِ بنیات ءَ ٹیلنٹ ءِ دیمروئی ءِ واستہ کوشست کنگ ءَ اِنت، کرکٹ ءَ ھوار لیب ءُ گوازی ءِ ھمک پڑ ءَ زالبول ءُ مرد آناں برابریں موہ ءُ آسراتی پجاری مئے اولی ترجی آنی تہ ءَ ھوار اِنت۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ پاکستان زالبولانی کرکٹ ٹیم ءِ پیسریگیں کپتان ءُ نامداریں کرکٹر ثنا میر ءَ مزن وزیر محمد شہباز شریف ءَ گوں گند ءُ نند کت۔ مزن وزیر ءَ ثنا میر ءَ را انٹرنیشنل کرکٹ کونسل ءِ ہال آف فیم ءَ ہوار کنگ ءِ پد ءَ مبارک بات دات۔ مزن وزیر ءَ پاکستان ءِ زالبولیں کرکٹ ٹیم ءِ کپتان ءِ بستار ءَ ثنا میر ءِ کارکردگی ءَ را ساڑات۔ مزن وزیر ءَ گوشت کہ ثنا میر ءِ سروکی ءَ پاکستان زالبولانی کرکٹ ٹیم ءَ مزنیں سوبمندی یے رستگ ایش پاکستان ءَ سرجمیں دگنیا ءَ نامدار کتگ۔ منی اُمیت اِنت کہ شما وتی تجربہ ءِ گوما کرکٹ ءِ تہا نوکیں ٹیلنٹ آناں تربیت دیگ ءِ تہا فعال کرد پیلو کن اِت۔ مزن وزیر ءَ گوشت کہ حکومت لیب ءُ گوازی ءِ ھمک پڑ ءَ میرٹ ءِ بنیاد ءَ ٹیلنٹ ءَ را سہرا کنگ ءِ کوشست ءَ کنگ ءَ اِنت۔ کرکٹ ءَ ھوار لیب ءُ گوازی ءِ ھرچ پڑ ءَ زالبول ءُ مردین آناں یک وڑیں موہ ءُ آسراتی پجارینگ مئے اولی ترجی آنی تہ ءَ یکے ۔ اے موہ ءِ سر ءَ ثنا میر ءَ مزن وزیر ءِ شگر ءُ منت گپت ءُ گوشت کہ ورلڈ کرکٹ ایسوسی ایشن ءُ آئی سی سی ءَ پاکستان ءِ سرجمی ءَ نمائندگی کنگ ءِ واستہ وتی جوانیں کوشست ءَ کنگ ءَ آں ۔ سنہ میر ءَ پاکستان ءَ ھاسیں رنگ ءَ زالبولانی کرکٹ ءَ را گیش دیمروئی دیگ ءِ واستہ سوج دات۔ آئی ءَ امیت سہرا کت کہ حکومت پاکستان ءَ ھاسیں رنگ ءَ زالبولی کرکٹ ءِ واستہ کرکٹ ءِ میدان ءُ نوکیں ٹیلنٹ ءِ واستہ گیشاں چہ گیش موہ پیداک کنگ ءِ واستہ گامگیج چست کنت۔
