ورلڈ بینک ءَ پاکستان ءِ چاگردی ءُ اقتصادی دیمروئی ءُ مئے شہری آنی زندمان ءَ را گہتر کنگ ءِ تہ ءَ کلیدی کرد پیلو کتگ، وفاقی وزیر احد چیمہ ءَ ورلڈ بینک ءِ سروکی ءَ گوں گند ءُ نند آنی تہ ءَ گپ ءُ تران

واشنگٹن۔27جون (اے پی پی): وفاقی وزیر برائے اقتصادی کار احد چیمہ ءَ گوشت کہ مزنیں دیمروئی شریک ءِ بستار ءَ ورلڈ بینک ءَ پاکستان ءِ چاگردی ءُ اقتصادی دیمروئی ءُ مئے شہری آنی زندمان ءَ را گہتر کنگ ءِ تہ ءَ کلیدی کرد پیلو کتگ۔ پاکستان ملکی شریکی پروگرام ءِ جوانیں رنگ ءَ عمل درآمد ءِ واستہ یک فریم ورک ءِ جوڑ کنگ ءَ انت۔ آئی ءَ اے گپ امریکہ ءِ سرکاری تر ءُ تاب ءِ ساھت ءَ ورلڈ بینک ءِ سروکی ءَ گوں مزن تک ءِ گند ءُ نند ءَ کت انت۔ ورلڈ بینک ءِ منیجنگ ڈائریکٹر برائے آپریشن انا بیجاردی ءُ جنوبی ایشیا ءِ دمگی نائب صدر جناب مارٹن ریسر ءِ گوما یک جوانیں گند ءُ نند ءِ تہ احد چیمہ ءَ گوستگیں سال ءِ تہ ءَ پاکستان ءُ ورلڈ بینک گروپ ءِ نیام ءَ مھکمیں کمک ءِ ساڑات کت۔ وفاقی وزیر احد چیمہ ءَ گوشت کہ دیمروئی ءِ مزنیں شریک ءِ بستار ءَ ورلڈ بینک ءَ پاکستان ءِ چاگردی ءُ اقتصادی دیمروئی ءُ مئے شہری آنی زندمان ءَ را گہتر کنگ ءِ واستہ ناگزیریں کرد پیلو کتگ۔ آئی ءَ 2022ءِ سیلاب ءُ کوویڈ 19 ءِ وبا ءَ گوں گر ءُ چیل بوھگ ءِ واستہ ورلڈ بینک ءِ نیمگ ءَ داتگیں کمک ءِ توسیپ کت۔ احد چیمہ ءَ گیش گوشت کہ اے ھاسیں شریکداری ءَ را دیم ءَ برگ ءِ تہ ءَ انا بیجاردی ءُ مارٹن ریسر ءِ کرد ستا کرز اِیت۔ سی پی ایف ءِ بنگیج ءَ را ھیال ءَ دارگ ءَ وفاقی وزیر ءَ گوشت کہ حکومت پاکستان ورلڈ بینک ءِ کمک ءَ سی پی ایف ءَ چہ سرجمی ءَ سیت زورگ ءِ واستہ نفاذ ءِ فریم ورک جوڑ کنگ ءَ انت۔ احد چیمہ ءَ پاکستان ءِ ورلڈ بینک ءِ میاں اوستمانی ءُ شمالی افریقہ ءِ دمگ ءَ دیم دیگ ءِ وش اتک کت ءُ گوشت کہ اے گامگیج ءَ چہ زانت ءِ بدلی ءُ دمگی رابطہ ءِ واستہ ارزشتی ایں موہ پیداک بنت۔ ورلڈ بینک ءِ ایگزیکٹو ڈائریکٹر عبدالحق بدجاؤی ءَ گوں جتا گند ءُ نند ءَ احد چیمہ ءَ پاکستان ءِ نیمگ ءَ مدام جوانیں کرد پیلو کنگ ءِ توسیپ کت۔ گپ ءُ تران ءِ تہ ءَ ورلڈ بینک ءِ نوکیں منظوری آنی سر ءَ ھم چمشانک دیگ بوتگ کہ ایشی ءِ تہ ءَ 700 ملین ڈالر ءِ ریکو دیک کان کنی منصوبگ ءُ 400 ملین ڈالر ءِ رسک پارٹیپیشن فیسلٹی ھوار اَنت کہ اعتراض آنی باوجود دیم ءَ شتگ اَنت۔ وفاقی وزیر احد چیمہ ءَ سی پی ایف ءِ دیمروئی مول ءُ مراد آناں سرجم کنگ ءِ واستہ ورلڈ بینک ءِ ملکی ٹیم ءِ گوما نزیکی ءَ کار کنگ ءِ پاکستان ءِ عزم ءِ سر ءَ زور پر دات۔ ورلڈ بینک ءِ سروکی ءَ وفاقی وزیر احد چیمہ ءِ وژن ءِ توسیپ کت ءُ ملکی شریکداری ءِ فریم ورک ءِ جوانیں رنگ ءَ عمل درآمد ءِ واستہ وتی سرجمیں کمک ءِ دل یکیمی دات ءُ پاکستان ءِ پائیدار اقتصادی دیمروئی ءِ واستہ ادارگ ءِ برجاھیں عزم ءِ ھم دل یکیمی دات۔