اسلام آباد۔ 14جولائی (اے پی پی) وزیرداخلہ چوہدری نثارعلی خان پارینے کہ پاکستان چین تون انسداد دہشت گردی، سلامتی ، اودیم معلومداری نا تبادلہ و واپار نا بشخ آتیٹی گیشترکمکاری پاکستان کن 21می صدی ٹی اسہ فیصلہ کن شریداری اس مریک۔ داخیال آتا درشانی ئِ او السی جمہوریہ چین نا وزیربرائے سلامتی جینگ ہوئی چانگ تون ہیت وگپ کرسا کرے ہراک پنچ شنبے آ اوڑتون داڑے بڑزکو کہولی ڈل اتون اوار اوڑدہی کریر۔ وزارت داخلہ نا کنڈآن جاری بیان نا رداٹ چین نا بڑزکو کہولی ڈل اٹی چین نا انسداد دہشت گردی، تکنیکی و انٹیلی جنس ڈویژن آتا بڑزکو کمامدارآک اوار ئسر۔ اوڑدہی ٹی ہڑتوم آ ملک آتا سیکورٹی اسٹبلیشمنٹس نا نیام اٹ انٹیلی جنس معلومداری نا تبادلہ، انسداد دہشت گردی کن رابطہ و چین پاکستان اکنامک کوریڈور (سی پیک) نا سیکورٹی تون اوار جتا معاملہ غاتا درشان خیال کننگا۔ وزیر داخلہ ہیت وگپ کرسا پارے کہ سی پیک نا رکھ و سرسہب پوروی آن پاکستان و چین نا نیام اٹ سنگتی نا پوسکن ئُ کسرآک ملنگرہ و ہڑتوم آ ملک آتا نیام اٹ اسٹریٹجک و اقتصادی تعلقداریک پین سوگو مریرہ۔ اوپارے کہ سی پیک آن پاکستان و چین ئِ ڈیہہ و اوڑآن ہم مون اسکان تینا واپار ئِ مون آ دننگ نا وارخواہی دوبریک۔ اوپارے کہ سئی پیک پاکستا ن و چین نا نیام اٹ نہ صرف اسہ بے کچ اہم ڈٹ اسے بلکن دا پاکستان و چین نا تعلقداری تا تزویراتی گہرائی نا حامل ہم ارے۔ اوپارے کہ ہڑتوم آ کنڈآتے دا علاقائی و جہانی واک آتیان محتاط مروئی مرے ہرا تینا مفادات آتا سوب سی پیک نا ڈٹ ئِ خواپسہ ۔ وزیر داخلہ دا عزم ئِ دوہرائفے کہ پاکستان سی پیک نا برخلاف غٹ کہول آتیا ہر وڑنا سازش آتے بے سہب جوڑ کیک۔ اوپارے کہ ہڑتوم آ کنڈآتے دہشت گردی نا برخلاف جنگ ، انتہاءپسندی و بیدادی نا چٹفنگ کن انٹیلی جنس معلومداری نا تبادلہ ئِ دمدستی وڑاٹ ودفوئی مرے۔ وزیر داخلہ پارے کہ پاکستان دا غٹ دہشت گرد رڑتا برخلاف جنگ ئِ برجاتخک ہرا پاکستان اٹی گڑبڑ ودی کننگ و بیدادی تالان کننگ خوائرہ۔ اوپارے کہ پاکستان اسہ رڑاسے ہم پاکستان آن پیشن بیدادی کن تینا گل زمین کاریم اٹ ہتنگ نا موکل تفننگ نا عزم کرینے۔ دہشت گرد رڑتا برخلاف جاری جنگ انابابت درشان خیال کرسا وزیر داخلہ چوہدری نثارعلی خان پارے کہ آپریشن ضرب عضب نا بھرم آتا بننگ نا بنامسنے۔ پاکستان اٹی سی پیک تون اوار کیہی شونداری ڈٹ آتے ٹی کاریم کروک آ چینی شاری تا سلامتی نا بابت وزیر داخلہ پارے کہ چینی کارندہ غاتا رکھ اکن پاک فوج انا سروکی ٹی اسپیشل سیکورٹی ڈویژن مست آن کاریم کننگ ئِ۔ السی جمہوریہ چین نا وزیر برائے سلامتی جینگ ہوئی چانگ دہشت گردی نا برخلاف جنگ خاص کر آپریشن ضرب عضب اٹی دوئی مروک آ سرسہبی تا ستائِ کرے۔ ہڑتوم آ پلو آک گیشتر تکنیکی کمک و رابطہ غاتا کمک اٹ احوال و انٹیلی جنس معلومداری ئِ پین سوگو جوڑ کننگ آ اتفاق کریر۔
