پاکستان ءَ تاجکستان ءُ پاکستان دود ءُ ربیدگ ءِ میلہ ءَ میان اُستمانی ایشیا ءِ گوما سیادی ءَ را گیش مھکم کنگ ءِ جزم ءِ  درشان

اسلام آباد۔20دسمبر  (اے پی پی):مواصلات ءِ وفاقی وزیر عبدالعلیم خان ءَ لوک ورثہ ءَ برجم داشتگیں تاجکستان ءُ پاکستان ءِ دود ءُ ربیدگ ءِ میلہ ءَ بہر زورگ ءِ وھد ءَ میاں اوستمانی ملک آنی گوما سیادی ءَ را مھکم کنگ ءِ واستہ پاکستان ءِ جزم ءِ سر ءَ پدا زور پر دات۔ آئی ءَ دود ءُ ربیدگ ءِ سیادی ءَ را یک موثریں وسیلگ ءِ رنگ ءَ وت مہ وتی ءِ دیمروئی ءُ دمگی کمک ءِ دیمروئی ءِ ھاترا لیک اتگ۔ وفاقی وزیر لوک ورسہ ءَ سر بوھگ ءِ پد ءَ پاکستان ءَ تاجکستان ءِ سفیر شریف زادہ یوسف ءَ آئی ءِ وش اتک کت۔ اے موہ ءِ سر ءَ سفارتکار آنی ھوار مزنیں کارندہ ءُ دود ءُ ربیدگ ءِ نمائندہ ھم ھوار بوتگ اَنت کہ ایشی ءَ چہ دو نیمگی سیادی آنی تہ ءَ گیش بوھوکیں گرمائش ءِ درشان اِنت۔ میلہ ءِ تہ ءَ پاکستان ءُ تاجکستان ءِ یکجائی ورثہ ءُ فنکارانہ دود ءُ ربیدگ آنی سر ءَ چمشانک دیگ بوتگ کہ ایشی ءَ را بھر زوروک ءُ ھواریں مردم آنی نیمگ ءَ سک باز ستا کرتگ۔ مراگش ءَ گوں تران کنان ءَ وفاقی وزیر عبدالعلیم خان ءَ تاجکستان ءَ چہ 75باسکی دود ءُ ربیدگی گل ءِ وشیں ءُ دلکشیں کارکردگی ءِ توسیپ کت۔ آئی ءَ تاجکستان ءِ زرباری دود ءُ ربیدگ ءِ جوانیں رنگ ءَ پیش دارگ ءِ ھاترا ازمکار آناں شگر ءُ منت گپت ءُ پاکستان ءِ حکومت ءُ الس ءِ نیمگ ءَ دلبڈی دات۔ آئی ءَ گوشت کہ پاکستان تاجک ازمکار آناں وش اتک کنت ءُ راج دود ءُ ربیدگی تبادلہ ءَ را راج آنی نیام ءَ دوستی ءُ یکوئی ءِ مھکم کنگ ءِ جوانیں وسیلگ لیک ایت۔ وفاقی وزیر ءَ گوشت کہ میاں اوستمانی ملک آنی نیام ءَ گہتریں ثقافتی ءُ تہذیبی سیادی ءَ چہ جتا جتائیں پڑ آنی تہ ءَ گیشیں دمگی کمک ءِ واستہ مھکمیں بنیات ءِ پجارینگ بیت۔ تاجکستان ءِ حکومت ءِ ثقافتی ڈل ءِ روان دیگ ءِ سرا منت وار آں آئی ءَ گوشت کہ پاکستان دمگی ھوار بوھگ ءِ پالیشی ءِ چیر دستی ءَ تاجکستان ءُایندگر میاں اوستمانی ملک آنی گوما کمک ءَ را گیش کنگ ءِ واھشت مند اِنت۔ میلے ءِ موہ ءَ تاجکستان ءِ سفیر شریف زادہ یوسف ءَ وفاقی وزیر ءِ گوما وت مہ وتی دلپوشی ءِ جیڈھ آنی سر ءَ ھم ھیال ریچی کت۔ سفیر ءَ گوشت کہ تاجک دود ءُ ربیدگی گل وتی تر ءُ تاب ءِ وھد ءَ لاہور ءَ ھم ازم پیش کنت، ایشی ءَ چہ دود ءُ ربیدگی تبادلہ ءِ دائرہ گیش پراھی بیت۔ تاجکستان ءِ دود ءُ ربیدگ ءِ وزیر متلب خان اسٹوریون ءَ ھم عبدالعلیم خان ءَ گوں گند ءُ نند کت ءُ پاکستان ءِ نیمگ ءَ چہ جوانیں مہمان داری ءُ گرمیں وش اتک ءِ پد ءَ تاجکستان الس ءِ نیمگ ءَ منت واری درشان کت۔ مراگش ءَ راجی ورثہ ءُ دود ءُ ربیدگ ءِ وفاقی وزیر اورنگزیب خان خیچی، سرکاری مزنیں حکام، سفارتی براتی ءِ باسک ءُ دود ءُ ربیدگ ءِ مردم آنی نیمگ ءَ ھم بھر زوری بوتگ۔ شریکیں مردماں اے گپ ءِ سر ءَ تپاک کت کہ اے وڑیں دود ءُ ربیدگ ءِ کار مردم آنی نیام ءَ سیادی ءَ را مھکم کن اَنت ءُ دود ءُ ربیدگ ءِ سفارتکاری ءِ وسیلگ ءَ دمگی یکوئی ءُ کمک ءِ دیمروئی ءِ پاکستان ءِ جزم ءَ را گیش مھکم کن اَنت۔