خیبر پختونخوا ءِ سرکار ءِ مستریں جیڑہ زرّ ءِ کمی نہ انت بلکیں انتظامی ناکامی انت، بلال اظہر کیانی

اسلام آباد۔20دسمبر  (اے پی پی):وزیر مملکت ءِ ھزانگ بلال اظہر کیانی ءَ گوشت کہ خیبر پختونخوا ءِ سرکار ءِ مستریں جیڈھ مالی وسیلگ آنی کمی نہ انت بلکیں نا شریں گورننس، انتظامی بے دلگوشی ءُ بد انتظامی انت۔ شمبے ءِ روچ ءَ نجی ٹی وی چینل ءَ گوں تران کنان ءَ آئی ءَ صوبائی حکومت ءِ اے گپ رد کت کہ آ فیڈریشن ءِ نیمگ ءَ چہ وسیلگاں چہ زبھر کنگ بوھگ ءَ اِنت ءُ گوشت کہ اے وڑیں الزام آئی ءِ انتظامی ناکامی آنی نیمگ ءَ چہ دلگوشی ءِ کشگ ءِ ھاترا ایر کنگ بنت۔ آئی ءَ گوشت کہ خیبر پختونخوا حکومت ءِ سیاسی اولویت وفاقی حکومت ءِ گوما دیم پہ دیم بوھگ ءُ الس ءِ وشھالی ءُ موثر سروسز ءِ پجاری ءِ بدل ءَ یک مردم ءِ بیعت ءِ سر ءَ گردگ ءَ انت۔ آئی ءَ گوشت کہ صوبائی حکومت ءَ باز رند ءَ وتی ناکامی آنی ذمہ واری فیڈریشن ءِ سر ءَ ایر کنگ ءِ کوشست کتگ ءُ اے گپ ءِ سر ءَ الزام جنگ بوتگ کہ نا شریں گورننس ءُ نزوریں کارکردگی ءَ را پُشدر کنگ ءِ واستہ فنڈز ءِ گر ءُ دار کنگ بوتگ۔ آئی ءَ گوشت کہ اے گپ بے بن انت۔ وفاقی حکومت ءَ خیبر پختونخوا ءَ را مدام وسیلگ داتگ اَنت ایشی ءِ تہ ءَ نوکیں ٹرانسفر 17دسمبر 2025ءَ ھوار اِنت۔آئی ءَ گوشت کہ 2010ءَ چہ نومبر 2025ءَ وفاقی حکومت ءَ خیبر پختونخوا ءَ را کل ءَ 8040ارب کلدار ءِ ٹرانسفر کتگ ایشی ءِ تہ ءَ این ایف سی ءِ چیر دستی ءَ 5867ارب کلدار ءِ ٹرانسفر ھوار اِنت۔ فنڈز ہر 15 روچ ءَ پد باقاعدگی ءَ شنگ کنگ بوتگ انت، بروقت ترسیل ءَ را یقینی جوڑ کنگ بوتگ۔ آئی ءَ اے گپ ءِ پدرائی کت کہ خیبر پختونخوا ءَ این ایف سی ایوارڈ ءِ چیر دستی ءَ وتی سرجمیں صوبائی بھر رستگ ءُ ھچ وڑیں بقایا واجبات نیست انت۔ وزیر مملکت ءَ گیش گوشت کہ 17دسمبر 2025 ءَ این ایف سی ءِ چیر دستی ءَ صوبائی حکومت ءَ را 46.44ارب کلدار ءِ زرّ ءِ یلہ کنگ بوتگ۔ ایشی ءَ ابید ناشرکاری ءِ گیشیں بار ءِ سبب ءَ 2010ءَ چہ صوبہ ءَ را یک درسد ءِ گیشیں شیئر ھم دیگ بوھگ ءَ اِنت کہ ایشی ءِ کلیں کساس 705ارب کلدار اِنت۔ آئی ءَ دگہ ھاسیں زرّ آنی ھم ذکر کت، ایشی ءِ تہ ءَ تیل ءُ گیس ءِ رائلٹی، 2019 ءَ چہ یکجا بوتگیں ضلع آنی واستہ 704ارب کلدار، اندری بے لوگیں مردم آنی واستہ 117ارب کلدار، ایشی ءَ ابید دیمروئی ءِ دگہ فنڈز ءُ بے نظیر انکم سپورٹ پروگرام (بی آئی ایس پی) ءِ فنڈز ھوار اَنت۔ آئی ءَ گوشت کہ اے درستیں وسیلگ برجاھی ءَ پجاری کنگ بوتگ اَنت ایشی ءِ ثبوت اِنت کہ وفاقی حکومت ءَ وتی ذمہ واری پیلو کتگ اَنت۔ بلال اظہر کیانی ءَ اے گپ ءِ سر ءَ زور پر دات کہ خیبر پختونخوا ءَ اصل جیڈھ فنڈز ءِ دست نہ کپگ نہ اِنت بلکیں انتظامی گنجائش ءِ کمی، اولیت دیگ ءُ گورننس ءِ سر ءَ دلگوشی ءِ کمی اِنت۔ آئی ءَ گوشت کہ صوبائی حکومت جان سلامتی، وانگ ءُ زانگ ءُ السی وشھالی ءِ وڑیں ھاسیں شوبگ آنی تہ ءَ جوانیں رنگ ءَ کار کنگ ءَ ناکام بوتگ، ایشی ءِ سبب ءَ اے شوبگ آناں سک باز نزور کنگ بوھگ ءَ اِنت۔ وزیر مملکت ءَ صوبائی انتظامیہ ءِ سر ءَ ھم گمراہ کنوکیں بیانیہ ءِ شنگ کنگ ءِ سر ءَ ایراد گپتگ ءُ گوشت کہ وسیلگ آنی کمی ءِ دروگیں دعویٰ آنی وسیلگ ءَ آئی ءِ ناکامی آنی نیمگ ءَ چہ دلگوشی ءَ را کشگ ءِ کوشست کنگ بوھگ ءَ اِنت۔ آئی ءَ گوشت کہ ما راستی ءُ اعداد و شمار پیش کنگ ءَ آں تانکہ الس راستی ءَ سرپد بہ بیت۔ آئی ءَ خیبر پختونخوا حکومت ءَ را زور پر دات کہ آ سیاسی دیم پہ دیم ءُ ذاتی ایجنڈا آنی بدل ءَ جوانیں حکومت داری، السی وشھالی ءُ داتگیں وسیلگ آناں جوانیں رنگ ءَ کارمرد کنگ ءِ سر ءَ دلگوشی بہ دنت۔ آئی ءَ گوشت کہ صوبائی حکومت ءِ واستہ اے المی انت کہ آ ریاست ءَ را نزور کنوکیں بیانیہ ءِ بدل ءَ الس ءِ واستہ سروس ڈیلیوری ءُ دیمروئی ءِ آسر آنی سر ءَ دلگوشی بہ دنت۔