خیبر پختونخوا ءَ جولائی 2010ءَ بگر داں نومبر 2025ءَ چہ بہر ءُ بانگ ءِ آمدنی ءَ چہ 5867ارب کلدار، ناشرکاری ءِ ھلاپ ءَ جنگ ءِ ھاتر ءَ 705ارب کلدار رستگ، وفاقی وزارت خزانہ

اسلام آباد۔20دسمبر  (اے پی پی): وزارت خزانہ ءَ گشتگ کہ جولائی 2010 ءَ بگر داں نومبر 2025ءَ کل ءَ 5867ارب کلدار خیبر پختونخوا ءَ را چہ بہر ءُ بانگ ءِ آمدنی ءَ چہ دیم دیگ بوتگ کہ اے فیڈریشن ءِ نیمگ ءَ صوبگ ءِ مالی حق آنی وھد ءُ پاس ءِ سر ءَ ءُ یکجاھیں ادائیگی ءِ یک ھاسیں ثبوت اِنت۔ ھمے وھد ءِ تہ ءَ ناشرکاری ءِ ھلاپ ءَ جنگ ءِ رد ءَ 705ارب کلدار ءِ گیشیں زرّ ھم داتگ ات کہ ایشی ءِ تہ ءَ صوبگ ءَ را امن ءُ ایمنی ءِ برجائی، بحالی، ایمنی، ءُ چاگردی ءُ اقتصادی تاوان آنی گیواری ءِ تہ ءَ کمک کنگ بوتگ۔ اے وسیلگ نیشنل فنانس کمیشن ایوارڈ ءُ وفاقی حکومت ءِ  ھاسیں حکومتی گامگیج ءِ وسیلگ ءَ دیم دیگ بوتگ۔ شمبے ءِ روچ ءَ وزارت خزانہ ءِ نیمگ ءَ جاڑی بوتگیں بیان ءِ رد ءَ وفاقی حکومت این ایف سی ءُ گیشیں وفاقی کمک ءِ چیر دستی ءَ خیبر پختونخوا ءَ فنڈز ءِ وھد ءُ پاس ءِ سر ءَ دیم دیگ ءَ را دل یکیمی کنگ ءَ اِنت۔ حکومت پاکستان ءِ نیمگ ءَ وزارت خزانہ نیشنل فنانس کمیشن ءِ ایوارڈ ءُ ایشی ءَ چہ پد صوبہ خیبر پختونخوا ءَ مالیاتی وسیلگ آناں وھد ءِ سر ءَ ، شفاف ءُ یکجاھیں ٹرانسفر ءَ را دل یکیمی کنگ ءِ واستہ وتی عزم ءِ یک رند ءَ پدر کنت۔ اے گامگیج فدراسیون ءِ مھکمیں عزم ءِ درشان اِنت کہ آ صوبائی دیمروئی، مالیاتی استحکام ءُ جنگ ءَ پد ءِ بحالی ءِ عمل ءَ استان ءِ سرجمیں کمک ءَ کنت۔ ھپتمی این ایف سی ایوارڈ ءِ چیر دستی ءَ صوبائی بھر ءُ بانگ ءِ آمدنی ءِ تہ ءَ خیبر پختونخوا ءِ بھر 14.62درسد ءِ سر ءَ ٹھینگ بوتگ۔ ناشرکاری ءِ ھلاپ ءَ جنگ ءِ وھد ءَ صوبہ ءِ سر ءَ غیر معمولی بار ءِ اعتراف ءَ نا بھر ءُ بانگ بوتگیں بھر ءُ بانگ ءِ آمدنی ءِ تہ ءَ یک درسد ءِ گیشیں بھر ھاسیں رنگ ءَ خیبر پختونخوا ءَ را داتگ ات۔ اگاں چہ 7می این ایف سی ایوارڈ ءِ بندات ءَ پنچ سال ءِ مدت ءِ واستہ جوڑ کنگ بوتگ بلے 8می، 9می ءُ 10می این ایف سی ایوارڈ ءِ سر ءَ تپاکی ءِ نہ بوھگ ءِ سبب ءَ 7می این ایف سی ایوارڈ ءِ فریم ورک انگت ءَ برجاہ اِنت۔ اے رد ءَ خیبر پختونخوا ءَ را مدام وتی ھک ءِ بھر رسگ ءَ اِنت ایشی ءِ تہ ءَ ناشرکاری ءِ ھلاپ ءَ جنگ ءِ واستہ گیشیں تخصیص ھم ھوار اِنت۔ وفاقی حکومت صوبائی این ایف سی ءِ شیئر 15 روچ ءِ بنیاد ءَ دنت ءُ اے درگت ءَ بقایا جات نیست انت۔ حالی ءَ (17دسمبر 2025 ءَ) خیبر پختونخوا حکومت ءَ را 46.44ارب کلدار ءِ زرّ ءِ یلہ کنگ بوتگ کہ اے وھد ءِ سر ءَ زرّ ءِ دیم دیگ ءِ وفاقی عزم ءِ پدریں گواہ اِنت۔ 7می این ایف سی ایوارڈ ءِ چیر دستی ءَ ٹرانسفر: جولائی 2010ءَ چہ نومبر 2025ءَ تاں بہر ءُ بانگ ءِ آمدنی ءِ تہ ءَ چہ خیبر پختونخوا ءَ کل 5867ارب کلدار ءِ ٹرانسفر کنگ بوتگ۔ ھمے وھد ءِ تہ ءَ ناشرکاری ءِ ھلاپ ءَ جنگ ءِ واستہ ھم 705ارب کلدار ءِ پجارینگ بوتگ کہ اے صوبگ ءِ قربانی ءُ ذمہ واری آنی منگ ءِ درشان اِنت۔ این ایف سی ءَ ابید وفاقی حکومت ءَ ھم براہ راست ٹرانسفر ءِ سلسلہ ءَ را بے رکاوٹ ءَ برجاہ داشتگ۔ جولائی 2010ءَ چہ نومبر 2025ءَ تیل ءُ گیس ءِ رائلٹی، گیس ءِ دیمروئی سرچارج، نیچرل گیس ءِ سر ءَ ایکسائز ڈیوٹی ءُ ایشی ءَ گوں سیادی داروکیں ایندگر چیز آنی چیر دستی ءَ 482.78ارب کلدار ءِ زرّ ءِ ٹرانسفر کنگ بوتگ۔ این ایف سی ءَ چہ ابید گیشیں وفاقی کمک ھم دیگ بوتگ۔ خیبر پختونخوا ءِ دیم ءَ مالی ءُ انتظامی چیلنج آنی رد ءَ وفاقی حکومت ءَ این ایف سی ءِ فریم ورک ءَ چہ ابید مزنیں مالی کمک داتگ۔ ھپتمی این ایف سی ایوارڈ ءَ پد، پیسریگیں فاٹا ءِ گوں خیبر پختونخوا ءَ یکجا بوھگ ءُ نوکیں این ایف سی فارمولہ ءِ نہ بوھگ ءَ پد وفاقی حکومت وتی این ایف سی ءِ شیئر ءَ چہ نوک یکجا بوتگیں ضلع آنی ھرچ ءُ درچ ءَ برداشت کنگ ءَ اِنت۔ 2019 ءَ چہ 704ارب کلدار خیبر پختونخوا حکومت ءَ را این ایم ڈیز ءِ واستہ دیم دیگ بوتگ۔ 117.166ارب کلدار ءِ کمک ءِ واستہ جتا جتائیں وھد ءُ پاس آنی تہ ءَ کمک کنگ بوتگ۔ ھرچ ءُ درچ ءُ وفاقی پروگرام آنی چیر دستی ءَ آئینی مینڈیٹ ءِ باوجود وفاقی حکومت صوبائی وشھالی ءُ دیمروئی ءِ تہ ءَ سرمایہ کاری ءَ برجاہ دار ایت۔ گوستگیں پانزدہ سال آنی تہ ءَ 2016 ءَ وفاقی پی ایس ڈی پی ءِ چیر دستی ءَ صوبائی دیمروئی منصوبگ آنی واستہ 115ارب کلدار ءِ زرّ ءِ ھرچ ءُ درچ کنگ بوتگ۔ بے نظیر انکم سپورٹ پروگرام ءِ وسیلگ ءَ مالی سال 2016ءَ چہ 2025ءَ خیبر پختونخوا ءَ 481.433ارب کلدار غیر مشروط ءُ مشروط نقد کمک ءِ شکل ءَ ھرچ کنگ بوتگ ایشی ءَ چہ نزوریں لوگ آناں ھاسیں چاگردی رکھینگ رستگ۔ ویں این ایف سی ایوارڈ ءِ سر ءَ پیشرفت ، وفاقی حکومت این ایف سی ءِ فریم ورک ءَ را مھکم کنگ ءِ واستہ جامع مشاورت ءِ واستہ جزم انت۔ 11می این ایف سی ایوارڈ 22اگست 2025ءَ پاکستان ءِ صدر ءِ نیمگ ءَ جوڑ کنگ بوتگ وھدے کہ ایشی ءِ اولی دیوان 4دسمبر 2025ءَ برجم دارگ بوتگ۔ خیبر پختونخوا ءِ حکومت ءِ لوٹ ءِ رد ءَ اے ذیلی گروپ ءِ اولی دیوان 23دسمبر 2025 ءَ برجم دارگ بیت کہ ایشی ءِ سروکی ءَ وزیر خزانہ خیبر پختونخوا بطور کنوینر بیت۔ اے گامگیج وت مہ وتی کمک ءُ شفافیت ءِ وسیلگ ءَ بقایا مالیاتی جیڈھ آنی گیواری ءِ نیمگ ءَ جوانیں گامگیج اِنت۔ وزارت خزانہ یک رندے پدا اے گپ ءِ پدر کنگ ءَ انت کہ وفاقی حکومت خیبر پختونخوا ءِ صوبہ ءِ منصفانہ وسیلگ ءِ تخصیص، مالیاتی وفاقی ءُ برجاھیں کمک ءِ سرا سرجمیں رنگ ءَ پابند انت، تانکہ سیکورٹی چیلنج، آوار جنگ ءُ انتظامی یکجاھی ءَ چہ پیداکیں صوبائی لوٹ ءُ گزراں وھد ءُ پاس ءِ سر ءَ ءُ ذمہ واریں رنگ ءَ پیلو کنگ بہ بیت۔