توشاخانہ کیس ءَ را بے جواز ءَ سیاسی رنگ دیگ ءِ جہد کنگ بوتگ،  طلال چوہدری

فیصل آباد ۔ 20 دسمبر (اے پی پی): وزیر مملکت ءِ تہی کارانی سینیٹر طلال چوہدری ءَ گوشت کہ توشاخانہ کیس یک سادہ، ھاسیں ءُ شواہد ءِ سر ءَ مبنی کیسے بوتگ کہ ایشی ءَ را بے جواز ءَ سیاسی رنگ دیگ ءِ کوشست کنگ بوتگ، اگاں چہ کہ کانود ءِ تہ ءَ مقبولیت یا سیاست دان بوھگ بے گناہی ءِ دلیل نہ اِنت بلے کانود ھرکس ءِ واستہ برابر اِنت۔ لائیو اسٹاک ڈیپارٹمنٹ ءِ مراگش ءَ پد میڈیا ءَ گوں تران کنان ءَ آئی ءَ گوشت کہ فیس بک، سوشل میڈیا ءُ آمید گس ءِ ریکارڈ وت گواہ اَنت کہ ارزشتی ایں سوگات ایشانی تہ ءَ کروڑانی ارزشت ءِ ہار ھم توشاکھانا ءَ جم کنگ ءِ بدل ءَ وتی کارمردی ءِ واستہ ایر کنگ بوتگ اَنت، آیانی ارزشت کم گندگ بوتگ ءُ ریاستی پوزیشن ءِ زورگ بوتگ۔ اے کار نہ ایوک ءَ کانود ءِ ھلاپ ورزی اِنت بلکیں پاکستان ءِ میان اُستمانی ساکھ ءِ ھاترا ھم تاوان بار ثابت بوتگ۔ آئی ئَ گوشت کہ دوستیں ملک ئِ نیمگ ئَ داتگیں سوگات راجی امانت اِنت۔ ایشانی ناجائز کارمرز کنگ پاکستان ءِ ھاترا شرمندگی ءِ سبب جوڑ بوت کہ ایشی ءِ اثر انگت ءَ درملک ءَ سفارتی تک ءَ گندگ بنت۔ بلے انوگیں سرکار ءَ اے نظام سرجم ءَ شفاف کتگ۔ نوں ھرچ سرکاری سوگاتے سرکاری رنگ ءَ پیش دارگ بیت، آئی ءِ نیلامی کیمرہانی دیم ءَ کنگ بیت ءُ رستگیں زرّ پہ وشھالی ءِ کاراں، وانگ ءُ زانگ ءُ جان سلامتی ءَ ھرچ کنگ بنت۔ نوں ہچ حاکم یا افسر ذاتی طور ءَ سوگاتاں وتی گور ءَ داشت نہ کنت۔ طلال چوہدری ءَ گشتگ کہ کیس ءَ را سیاسی جار جنگ ءَ چہ جرم ہلاس نہ بیت۔ اگاں سوگات رس اِتگ، جم نہ بوتگ ءُ آئی ءِ ارزشت رد اِنت گڑا اے یک ھاسیں جرمے ۔ قانون ءِ لوٹ انت کہ سیاست دان چہ عام شہریاں گیشتر احتساب بہ کن انت۔ زھگانی ویزہ ءُ ناڈرا کارڈ ءِ بابت ءَ سرپدی دیان ءَ آئی ءَ گوشت کہ وزارت داخلہ ءِ ریکارڈ ءِ رد ءَ مرچیگیں روچ ءَ تاں ھچ وڑیں ویزہ ءُ نیکاپ ءِ درخواست جم کنگ نہ بوتگ۔ اگاں درخواست دیگ بہ بیت گڑا لہتیں کلاک ءِ تہا ویزا ءِ جار جنگ بیت۔ ہمدردی ءِ کارڈ ءِ گوازینگ ءِ بدل ءَ قانونی کارروائی کنگ بہ بیت۔ آئی ءَ زندان ءِ آسراتی ءِ بابت ءَ شنگ بوتگیں ردیں لیکہ ھم رد کتگ ءُ گْوشتگ کہ دزگیریں مردم ءَ را کانود ءِ رد ءَ سرجمیں آسراتی ھست اَنت ایشانی تہ ءَ طبی آسراتی، زاتی کارندہ ءُ دیوان ءِ اجازت ھوار اَنت۔ اے گپ ءِ باوجود بے وسی ءِ پروپیگنڈا کنگ بوھگ ءَ اِنت۔ وزیر مملکت ءَ گوشت کہ گوست ءَ انصاف ءِ نظام ءَ آسراتی بوتگ بلے نوں اے وڑ نہ انت۔ نوں ثبوت ءُ قانون ءِ بنیاد ءَ پیسلہ کنگ بوھگ ءَ انت ءُ ھرکس کہ قانون ءِ ھلاپ ورزی ءَ ھوار انت آئی ءَ را جواب دیگی انت ھرچ وڑیں زوراک ءُ راج دوست بہ بیت۔ دری پالیشی ءِ بابت ءَ گپ جنان ءَ آئی ءَ گوشت کہ مرچی پاکستان ءِ سفارتکاری راجدپتر ءِ مھکمیں تک ءَ انت۔ چین، امریکہ، یورپ، عرب ملک ءُ ھاسیں رنگ ءَ سعودی عرب ءِ گوما اسٹریٹجک ءُ دفاعی شریکداری پاکستان ءِ سر ءَ جھان ءِ بھروسہ ءِ ثبوت اِنت۔ اے پاکستان ءِ سوبمندی اِنت کہ مزن وزیر شہباز شریف ءِ سروکی ءَ ممکن بوتگ۔ آئی ءَ اے گپ ءِ پدرائی کت کہ حکومت ءِ دلگوشی ایوک ءَ پاکستان، آئی ءِ مردم ءُ آھانی جیڈھ آنی گیواری ءِ سر ءَ اِنت۔ احتجاج، استعفیٰ یا فشار ءِ سبب ءَ قانون ءِ راہ بدل کنگ نہ بیت۔ ھما کار کہ کنگ بوتگ آئی ءِ حساب ءُ کتاب کنگ لوٹ ایت۔ گڈسرا طلال بدر چوہدری ءَ محکمہ لائیو سٹاک ءِ کارکردگی ساڑات ءُ گوشت کہ سرکاری ازمت ءِ منصوبگ اصل سیاست انت ءُ حکومت اے پڑ ءَ دیم ءَ کار کنت ۔