پاکستان ءِ ھلاپ ءَ پروپیگنڈا ءِ سروک گودی میڈیا ءِ دروگ پدر بوتگ اَنت، وزارت اھوالکاری ءُ شنگ کاری

اسلام آباد۔7نومبر  (اے پی پی): پاکستان ءِ ھلاپ ءَ پروپیگنڈا ءِ تہ ءَ سروکیں گودی میڈیا ءِ دروگ پدر کنگ بوتگ اَنت۔ پاکستان ءِ وزارت ءِ اھوالکاری ءَ گودی میڈیا ءِ نیمگ ءَ پاکستان ءِ ھلاپ ءَ جوڑ کتگیں رپورٹانی پول پچ کتگ۔ تفصیل ءِ رد ءَ ھندی شنگ کاری ءِ فریب کنوکیں ادارہ فرسٹ پوسٹ ءُ نیوز 18 ءِ من گھڑتیں دعویٰ ءِ راستی پدر بوتگ۔ پاکستان ءِ فوجی سروکی ءِ اے دعویٰ کہ آ پہ غزہ ءَ پاکستانی لشکر ءِ ایر کنگ ءَ اسرائیل ءَ چہ ”ڈالر زوریت“ دروگ ثابت بوتگ۔ بھارتی شنگ کاری ءِ ادارہ فرسٹ پوسٹ ءَ دروگیں دعویٰ کتگ کہ پاکستان ءِ فوجی سروکی ءَ امریکہ ءِ کمک ءَ غزہ ءِ امن مشن ءِ تہا اسرائیل ءَ چہ 10 ہزار ڈالر لوٹ کتگ۔ نیوز 18 ءِ جوڑ کتگیں ءُ مضحکہ خیزیں رپورٹ ءَ پاکستان، موساد ءُ سی آئی اے ءِ نیام ءَ رازداری ءِ گند ءُ نند ءِ ھم ھال داتگ۔ پاکستان ءِ وزارت اھوالکاری ءُ شنگکاری ءَ راستی پدر کتگ ءُ گْوشتگ کہ پاکستان، اسرائیل ءُ امریکہ ءِ نیمگ ءَ ھچ وڑیں دیوان ءُ مالی کمک نہ بوتگ۔ اے گپ ءُ تران ءِ ھچ وڑیں ثبوت ءُ سرکاری تصدیق نیست۔ پاکستانی درئی کارانی وزارت ءُ پاکستانی لشکر ءِ پبلک ریلیشنز ڈیپارٹمنٹ ءَ ھچ وڑیں فوجی دیم دیگ ءُ اسرائیل ءُ امریکی انٹیلی جنس ادارہانی گوں گند ءُ نند ءِ تصدیق نہ کتگ۔ پاکستان ءُ پاکستانی لشکر ءِ ھلاپ ءَ منفی پروپیگنڈا مہم ھندی رسانکدر ءِ باقاعدہ دروشم جوڑ بوتگ۔ ھندوستان راستیانی رد کنگ ءَ پاکستان ءِ فوجی ءُ سفارتی ساکھ ءَ تاوان دیگ ءِ پندل سازگ ءَ اِنت۔ گودی رسانکدر گمراہ کنوکیں ءُ دروگیں تبلیغ ءِ وسیلگ ءَ دمگ ءَ آشوب ءِ شنگ کنگ ءِ ناپاکی ءِ جھد ءَ اِنت۔