گوہر علی خان ءِ سروکی ءَ اپوزیشن ءِ ڈل ءَ راجی اسمبلی ءِ اسپیکر سردار ایاز صادق ءَ گوں گند ءُ نند

اسلام آباد۔7نومبر  (اے پی پی): گوہر علی خان ءِ سروکی ءَ اپوزیشن ءِ ڈل ءَ جمعہ ءِ روچ ءَ پارلیمنٹ گس ءَ راجی اسمبلی ءِ اسپیکر سردار ایاز صادق ءَ گوں گند ءُ نند کت۔ ڈل ءِ تہ ءَ راجی اسمبلی ءِ پیسریگیں اسپیکر اسد قصرہ ءُ راجی اسمبلی ءِ ایندگر اپوزیشن ءِ باسک ھوار اتنت۔ قومی اسمبلی ءِ سیکرٹریٹ ءِ رد ءَ گند ءُ نند ءَ قومی اسمبلی ءَ اپوزیشن ءِ سروک ءِ ایر کنگ ءِ بابت ءَ گپ ءُ تران کنگ بوتگ ۔ ڈل ءَ اپوزیشن ءِ سروک ءِ ایر کنگ ءِ مہکمیں لوٹ کتگ ۔ راجی اسمبلی ءِ اسپیکر سردار ایاز صادق ءَ ڈل ءَ را گوشت کہ اے وھد ءَ اے معاملہ آمید گس ءَ گوشدارگ بوھگ ءَ اِنت ءُ آمید گس ءِ پیسلہ ءَ پد ایشی ءِ سر ءَ چار ءُ تپاسی کنگ بیت۔ اے موہ ءِ سر ءَ تران کنان ءَ راجی اسمبلی ءِ اسپیکر سردار ایاز صادق ءَ گوشت کہ پارلیمنٹ جمہوریت ءِ مستریں ءُ معتبریں ادارگ انت ایشی ءِ برجائی ءِ واستہ توامیں سیاسی گل آناں جوڑیشت ءِ کرد پیلو کنگ لوٹ ایت۔ آئی ءَ اپوزیشن ءَ را پارلیمانی فورم ءِ تہ ءَ جوانیں کرد ءِ پیلو کنگ ءِ زور پر دات۔ اسپیکر سردار ایاز صادق ءَ گوشت کہ ملک ءِ دیم ءَ اوشتاتگیں سیاسی، معاشی ءُ راجی جیڈھ آنی گیواری ءِ واستہ حکومت ءُ اپوزیشن دوئیں وت مہ وتی مشورہ ءُ کمک ءِ جزبگ ءَ گوں دیم ءَ بوان اَنت۔ آئی ءَ گوشت کہ راجی مصالحت، پارلیمانی روایات آنی دیمروئی ءُ جمہوری عمل ءِ برجائی ءِ واستہ حکومت ءُ اپوزیشن ءِ نیام ءَ پُل ءِ کرد ءَ پیلو کنگ ءَ مدام ساڑی آں۔ راجی اسمبلی ءِ اسپیکر سردار ایاز صادق ءَ اے گپ ءِ حمایت ءِ درشانی کت کہ پارلیمنٹ ءِ توامیں باسک راجی مفاد ءِ رد ءَ کانود سازی ءِ عمل ءَ را موثر ، جوانیں ءُ آسر  ءِ رنگ ءَ دیم ءَ برگ ءَ انت تانکہ الس ءِ جیڈھ آنی دائمی گیواری ممکن بہ بنت۔