ریاستی سرپرستی ٹی نفرت انگیز بیانیہ نا مون آ دننگ آ کاربند گودی میڈیا جہانی کہول آ بے نقاب، منظم پروپیگنڈا و دروغ انا مون آ دننگ اٹ لگوک

اسلام آباد۔ 07 نومبر (اے پی پی) ریاستی سرپرستی ٹی نفرت انگیز بیانیہ نا مون آ دننگ آ کاربند گودی میڈیا جہانی کہو ل آ بے نقاب مس، گودی میڈیا سنسنی و شورشرابہ نا کمک اٹ منظم پروپیگنڈا و دروغ تڑنگ اٹ لگوک ءِ۔ سرجم حوال آتا رداٹ جہانی جریدہ الجزیرہ گودی میڈیا نا دروغ ، گمراہ کن دعویٰ و فریب ءِ مچ آ دنیا ٹی پاش کرے۔ جہانی جریدہ الجزیرہ نا رداٹ بھارتی میڈیا غا اعتبار نا تنکی غٹ آن زیات بھارت نا تہہ ٹی محسوس کننگک، میڈیا ادارہ غاتا ملکیت سیاسی و کارپوریٹ سیوتی تا دوٹی مرکوز مرسا کننگ ءِ۔ صحافی میناکشی راوی بھارتی میڈیاءِ تنقید نا شست کرساپارے کہ ہندوستانی میڈیا ءِ ہمسایہ ملک آتا کنڈآن پروپیگنڈا ٹول انا وڑاٹ ہُننگک ، بھارتی میڈیا سیم تا آرپار سنسنی خیز و ہندوتوا نا سیاست ءِ تشہیر کیک۔ بھارتی صحافی سمیتہ شرمانا پاننگ ئس کہ بھارت اٹ ٹیلی ویژن بھلو کچ اسے آ پت انا تنکی نا گواچی  ءِ و بنداوی صحافت آن ہم محروم ءِ، بھارتی میڈیا زیات شور وکم معلومداری تا جال اٹ اختہ مسنے، پاکستان نا برخلاف ہم بھارتی ٹی وی چینل آک لاہور وکراچی آ کوزہ نا بے بنداو و غلط رپورٹ نشرکریر۔ ہمال ساؤتھ ایشین نا ایڈیٹر رومن گوتھم پارے کہ بھارتی میڈیا نا اولیت دااف کہ الس ءِ حقی حالیت آتیان معلومدار کے۔ الجزیرہ نا رداٹ بھارت اٹ تنقیدی صحافی تے مقدمہ، پولیس کارروائی و نوکری تیان محروم کرسا چُپ کننگانے، جہانی پریس فریڈم انڈیکس اٹی بھارت نا درجہ بندی ہم پدریسہ تمسا کننگ ءِ، ریاستی سرپرستی ٹی دروغ و ہندوتوا نظریہ تالان کروک آ گودی میڈیا مچ آ دنیا ٹی بے نقاب مسنے۔