ترکی ءِ تہی کارانی وزیر علی یرلیکایا ءَ مزن وزیر محمد شہباز شریف ءَ گوں گند ءُ نند ، ، دیریں ءُ مھکمیں براتی سیادی ءَ را گیش مھکم کنگ ءِ  جزم ءِ درشان

اسلام آباد۔6نومبر  (اے پی پی): مزن وزیر محمد شہباز شریف ءَ ایمنی، ناشرکاری ءُ منشیات ءِ ھلاپ ءَ جنگ، پولیس ءِ تربیت، آفت ءِ گر ءُ دار، تجارت ءُ اقتصادی دیمروئی ءِ پڑ ءَ پاک ءُ ترکی ءِ نیام ءَ دو نیمگی کمک ءَ را گیش مھکم کنگ ءِ وتی جزم ءِ پدر کنگ ءَ پد اوگانستان ءُ برجاھیں ترکی ءِ سروکی ءَ را آسراتی دیگ ءِ ھاترا پاکستان ءِ منت گپت۔ پنچ شمبے ءِ روچ ءَ مزن وزیر گس ءَ ترکی ءِ تہی کارانی وزیر ءَ مزن وزیر محمد شہباز شریف ءَ گوں گند ءُ نند کت، ایشی ءِ تہ ءَ پاکستان ءُ ترکی ءِ نیام ءَ دیریں ءُ مھکمیں براتی سیادی آناں گیش مھکم کنگ ءِ جزم ءِ پدا پدر کنگ بوت۔ مزن وزیر ءَ جمہوریہ ترکی ءِ تہی کارانی وزیر علی یرلیکایا  ءُ آئی ءِ ڈل ءَ را پاکستان ءِ سرکاری تر ءُ تاب ءَ وش آتک کت ءُ گوشت کہ آہانی تر ءُ تاب پاکستان ءُ ترکی ءِ مہکمیں براتی سیادی ءِ درشان انت۔ مزن وزیر ءَ گند ءُ نند ءَ ترکی ءِ صدر رجب طیب اردوان ءَ را مبارکی کلوہ دات۔ آئی ءَ دوئیں ملک آنی نیام ءَ ایمنی، ناشرکاری ءِ ھلاپ ءَ جنگ، منشیات ءِ ھلاپ ءَ جنگ، پولیس ءِ تربیت، آفت آنی گر ءُ دار، تجارت ءُ اقتصادی دیمروئی ءِ پڑ آنی تہ ءَ دو نیمگی کمک ءَ را گیش مھکم کنگ ءِ جزم ءِ سر ءَ پدا زور پر دات۔ مزن وزیر ءَ ھاسیں جیڈھ آنی سر ءَ پاکستان ءِ موقف ءِ واستہ ترکی ءِ مھکمیں ءُ بے دروریں کمک ءِ توسیپ کت ءُ استنبول ءَ پاکستان ءُ اوگانستان ءِ نیام ءَ جاری امن گپ ءُ تران ءِ تہ ءَ آسراتی ءِ کرد پیلو کنگ ءِ واستہ ترک سروکی ءِ ھاسیں رنگ ءَ منت گپت۔ ترک تہی کارانی وزیر ءَ آئی ءُ ترک ڈل ءِ گرمیں مہمانداری ءِ سر ءَ مزن وزیر ءِ شگر ءُ منت گپت ءُ ترک صدر اردوان ءِ نیمگ ءَ چہ مزن وزیر ءَ را مبارکی کلوہ سر کت۔ آئی ءَ کانود ءِ نفاذ ءِ ادارگ، انٹیلی جنس شیئرنگ ءُ ڈیزاسٹر مینجمنٹ ءِ تہ ءَ کمک ءَ را گیش گیش کنگ ءِ واھشت ءِ درشان کت۔ گند ءُ نند ءِ تہ ءَ نائب مزن وزیر ءُ دری کارانی وزیر سینیٹر محمد اسحاق ڈار، تہی کارانی وزیر سید محسن رضا نقوی، تہی کارانی وزیر ءِ مملکت طلال چوہدری، ھاسیں کمکار طارق فاطمی، چیئرمین این ڈی ایم اے، سیکرٹری تہی کار ءُ دری کارانی سیکرٹری ھم ساڑی بوتگ اَنت۔