بنجائی وزیر چوہدری سالک حسین نا کماشی ٹی دیوان، پیشن نا ملک روزگار کن ہنوک آ بندغ آتے بالی پٹ آتیا آف لوڈ نا واقعہ غاتا نوٹس ءِ ہلنگا

اسلام آباد۔ 06 نومبر (اے پی پی) بنجائی وزیر اوورسیز پاکستانیز و شونداری انسانی وسیلہ چوہدری سالک حسین نا کماشی ٹی دیوان اس مس ہراٹی پیشن نا ملک روزگار کن ہنوک آ بندغ آتے بالی پٹ آتیا آف لوڈ نا واقعہ غاتا نوٹس ءِ ہلنگا۔ دیوان اٹی ڈائریکٹر جنرل ایف آئی اے رفعت مختار خصوصی بشخ ہلک۔ بنجائی وزیر ءِ چندی بالی پٹ آتیا ورکرز ءِ آف لوڈ کننگ نا واقعہ غاتیا حوال تننگا۔ وزارت آن پنچ شنبے نادے آ جاری پریس ریلیز نا رداٹ دیوان نا بشخ ہلوک آتون گپ وتران کرسا بنجائی وزیر پارے کہ ورک ویزا و پروٹیکٹر سرٹیفکیٹ آن پد ہم چندی بالی پٹ آتیا ورکرآتے آف لوڈ کننگا، پیشن نا ملک روزگار کن ہنوک آ پاکستانیک ننکن بے کچ عزت نا قابل ءُ کس اسے ورکرآتے غیرکانودی وڑاٹ توننگ نا موکل تفنہ، اوورسیز پاکستانی ملکی زرگزران ءِ چلیفنگ کن زرمبادلہ پاکستان آ گدریفرہ۔ بنجائی وزیر ڈی جی ایف آئی اے ءِ بالی پٹ آتیا ورکرآتے آف لوڈ کننگ نا باندات ءِ دمدستی وڑاٹ ایسر کننگ نا پارت کرساپارے کہ پین وخت اس ورک ویزہ ہولڈر آتے بالی پٹ آ آف لوڈ کننگپک۔ ڈائریکٹر جنرل ایف آئی اے رفعت مختار پارے کہ لاہور و کراچی بالی پٹ آ ورکرآتے آف لوڈ کننگ نا واقعہ رپورٹ مس ہرافتا جاست وپاست برجاءِ، اگہ ایف آئی اے کارندہ اس اوار خننگا تو سخت کارروائی کننگک۔