جموں نا شہید آتا قربانی دا عزم انا یات دہانی ءِ کہ سچائی ءِ توننگ مفک، سینیٹر اعظم نذیر تارڑ

اسلام آباد۔ 06 نومبر (اے پی پی) بنجائی وزیرکانود و انصاف و انسانی حق سینیٹر اعظم نذیر تارڑ پارینے کہ اینو نن جموں نا ہمو شہید آتے خراج عقیدت پیش کینہ ہرافک اکتوبر و نومبر 1947ء ٹی ڈوگرہ فوج و آر ایس ایس نظریہ غان زہمی انتہاپسند ٹولیک ظلم و بربریت نا شست کرسا شہید کریر ۔ پنچ شنبے نادے آ جموں نا شہید آتا دے انا وخت آ جاری کلہو اٹی بنجائی وزیرپارے کہ دا سانحہ سویلی ایشیانا تاریخ نا بدترین انسانی المیہ غاتیٹی شمار مریک۔ دنیا امریکی نائن الیون و نازی ظلم آتیا تو پبی چکار تس، ولے کشمیری تا ہمو کشت وخون ءِ گیرام کرے، ہراڑے بیرہ اِرا تُو اٹی اِرا لکھ شست ہزار آن زیات بے گناہ انسان تے شہید کننگا۔ مورخین اودے بیست می صدی نا تہار انگا بشخ آتیٹی شمار کرینے، ولے افسوز کہ دنیا اینو ہم کشمیری الس نا ڈکھیائی و قربانی تے گوجالنگ اٹی ءِ۔ اوپارے کہ دا حادثاتی ءُ واقعہ اس الوکہ بلکن ریاستی سرپرستی ٹی کروک آ اسہ منظم مہم ئس، ہرانا مسخت جموں وکشمیر نا آبادیاتی پنجر ءِ بدل کننگ ئس۔ نیمہ ملین آن زیات بندغ آتے تینا اُراتے ہلسا پاکستان آ ہجرت آ بیوس کننگا۔ مچ آ برادری آن برادری تے چٹفنگا۔ اوفتا اسٹ انگا ڈوہ اوفتا مذہب و آجوئی نا است خواہی ئس، 77 سال گدرینگ انگ آن پد ہم دا چرجوئی ناانصافی اینو ہم برجاءِ۔ اوپارے کہ 2019 ء ٹی آئین ہند انا آرٹیکل 370 و 35۔ اے انا چٹفنگ آن پد بھارت ڈیہہ اناخصوصی حیثیت ءِ چٹفسا اودے براہ راست دہلی نا بست وبند اٹی کرے۔ ڈغار وجائیداد آتا کانود آتیٹی بدلی کننگا، غیر ہندی آبادکاری نا ڈٹ انا بناءِ کننگا، و سرینگر 2035 ء کون آ شونداری ڈٹ آتے درستی راستی کرفنگا۔ ہرافتا مسخت وادی نا مسلم گیشتری تشخص ءِ بدل کننگ و کشمیری الس نا توار ءِ توننگ ءِ۔ سینیٹر اعظم نذیر تارڑ پارے کہ پاکستان کشمیری الس نا انصاف اٹ جہد اٹی اوفتے تون سوگوی اٹ سلوک ءِ۔ جموں نا شہید آتا قربانی دا عزم انا یات دہانی ءِ کہ سچائی ءِ توننگ مفک و انصاف ءِ مدامی کن توننگ مفک۔ پاکستان کشمیری الس تون ئس، ارے و مدام سلک۔