جموں نا شہید آتا عظیم قربانیک داہیت انا شاہدی ءِ ایترہ کہ ظلم وجور انا کمک اٹ اسہ قوم اسے نا ہم توار ءِ توننگ مفک، اسپیکر قومی اسمبلی

اسلام آباد۔ 06 نومبر(اے پی پی) اسپیکر قومی اسمبلی سردار ایاز صادق پارینے کہ جموں نا شہید آتا عظیم قربانیک داہیت انا شاہدی ءِ ایترہ کہ ظلم وجور انا کمک اٹ اسہ قوم اسے نا ہم توار ءِ توننگ مفک، ڈوگرہ مہاراجہ نا فوج و انتہاپسند زموار آتا دوتے اٹ اِرالکھ آن زیات کشمیری مسلمان تا کشت وخون و لکھ آتا ہجرت برصغیر نا تاریخ نا اسہ است ہسون ءُ بشخ اسے ہرادے فراموش کننگ مفک۔ پنچ شنبے نادے آ یوم شہدائے جموں نا وخت آ تینا کلہو اٹی اوشہید آتےزبردست خراج عقیدت پیش کرساپارینے کہ پاکستانی قوم کشمیری الس نا حق خودارادیت نا انصاف اٹ و روا جہد اٹی اوفتے تون ہم کوپہ سلوک ءِ۔ اوپارے کہ 6 نومبر 1947ء نا است ہسون واقعہ تاریخ نا ہمو تہار انگا بشخ آتیان اسٹ ءِ ہراتم ہزار آ کشمیری مسلمان تینا آجوئی و شناخت نا نہاد ءِ دتراٹ ادا کننگ آ بیوس مسر۔ سردار ایاز صادق پارے کہ جموں نا کشت وخون نئے بیرہ مذہبی منافرت و نسلی امتیاز نا بھیانک درور ءِ بلکن دا جہانی ضمیر کن اسہ  پاش آن پاش چیلنج اس ہم ارے۔ اوجہانی برادری، انسانی حق انا تنظیم و اقوام متحدہ غا زور شاغا کہ او 1947ء نا جموں سانحہ ءِ نسل کشی نا وڑاٹ امنا کیر و بھارت ءِ اونا غیرکانودی گام گیج و کشمیری تا بنداوی انسانی حق انا پامالی آ جوابدہ گوندر۔ اوپارے کہ بھارت نا کنڈآن غیرکانودی وڑاٹ کوزہ ٹی جموں وکشمیر اٹی آبادیاتی ساخت ءِ بدل کننگ نا کوشست، آرٹیکل 370 و A-35نا منسوخی و کشمیری تا ڈغارتیا غیرہندی تے رہینگ انگ، جہانی کانود و اقوام متحدہ نا قرارداد آتا پاش آن پاش خلاف ورزیءِ۔ اسپیکر پارے کہ بھارت نا غیرکانودی کوزہ و ریاستی جور، کشمیری تا عزم و استقلال ءِ متزلزل کننگ کپک۔ اوپارے کہ پاکستان پارلیمنٹ، حکومت و  الس کشمیری الس نا جہد آجوئی تون تینا اخلاقی ، سفارتی و سیاسی مخ تفی نا عزم ءِ دُوارہ کیرہ۔ پاکستان مدام مظلوم کشمیری تتون سلک و ہر جہانی فورم آ اوفتا توار ءِ بڑز کرسا کیک۔ اسپیکر سردار ایاز صادق پارے کہ شہدائے جموں نا قربانیک دا ہیت انا یات دہانی  ءُ کہ آجوئی نا کسر اٹ تروک آ دا قربانیک زیان مفسہ، جموں وکشمیر نا الس نا جیرت ، قربانی و استقامت دنیانا ہر ذی شعور انسان کن درور اسے۔ اوپارے کہ پاکستان نا پارلیمنٹ کشمیری ایلم و ایڑھ تتون تینا بدل مفروک یکجہتی نا درشانی ءِ کیک و جہانی برادری آن خواست کیک کہ او کشمیری الس ءِ اوفتا ہمو بنداوی حق، حق خودارادیت ترفنگ کن تینا گچین کڑد ءِ ادا کیر ہرا اقوام متحدہ نا قرارداد آتا رداٹ اوفتے دوئی ءِ۔ اسپیکر دا عزم انا درشانی ءِ کرے کہ پاکستان نا الس و پارلیمنٹ مدام جموں وکشمیر نا الس تون سلرہ۔