راجی فوڈ سیکیورٹی ءُ پٹ ءُ پول ءِ وفاقی وزیر رانا تنویر حسین ءَ شوگر ایڈوائزری بورڈ ءِ دیوان ءِ سروکی کتگ، 15 نومبر ءَ چہ کرشنگ ءِ موسم بندات کنگ ءِ پیسلہ

اسلام آباد۔ 5نومبر (اے پی پی): راجی خوراک ءِ سلامتی ءُ پٹ ءُ پول ءِ وفاقی وزیر رانا تنویر حسین ءِ سروکی ءَ اسلام آباد ءَ شوگر ایڈوائزری بورڈ ءِ یک ھاسیں دیوان ءِ برجم دارگ بوت۔ دیوان ءَ پاکستان شوگر ملز ایسوسی ایشن ءِ ڈل ءَ بہر زرتگ ات ایشی ءِ سروکی ءَ چوہدری زکا اشرف ءَ کتگ ات۔ ایشی ءَ ابید چاریں صوبہ آنی کین کمشنر آنی نمائندگ، وزارت صنعت ءُ پیداوار، وزارت تجارت ءُ ایندگر سیادی داروکیں ادارگ آنی نمائندگ ھم ھوار بوتگ اَنت۔ دیوان ءِ تہ ءَ سرجمیں شور ءُ سلاھ ءَ پد پیسلہ کنگ بوت کہ 15نومبر 2025ءَ چہ سرجمیں ملک ءَ شکر ءِ کرشنگ کنگ ءِ موسم بندات کنگ بیت۔ وفاقی وزیر ءَ اے موہ ءِ سر ءَ گوشت کہ اے پیسلہ سرجمیں صوبگ ءُُ شوگر ملز ایسوسی ایشن ءِ گوما سرجمیں شور ءُُ سلاھ ءَ پد کنگ بوتگ تانکہ شکر ءِ کشت ءُ کشار کنوک آناں ھچ وڑیں مشکل ءِ آماچ مہ بنت۔ رانا تنویر حسین ءَ اے گپ ءِ پدرائی کت کہ ھما شکر ءِ کارجاہ کہ ٹاک بوتگیں روچ ءَ کچلگ بندات نہ کن اَنت آھانی ھلاپ ءَ قانونی کارروائی کنگ بیت۔ آئی ءَ گیش گوشت کہ کشت ءُ کشاری ءِ بندات ءَ چہ پیسر کشت ءُ کشاری ءِ واجبات ءِ ادائیگی ءَ را دل یکیمی کنگ بیت ءُُ حکومت کشت ءُُ کشاری ءِ مفاد ءِ واستہ اے وڑیں پیسلہ کنگ ءَ انت دانکہ آ لگت مال مہ بنت۔ وفاقی وزیر ءَ اے گپ ءِ سر ءَ زور پر دات کہ وھد ءِ سر ءَ کچلگ ءَ چہ نہ ایوک ءَ گنی ءِ کشت ءُُ کشاری ءَ را آسراتی رس ایت بلکینگ ءَ مارکیٹ ءَ وھد ءِ سر ءَ شکر ءِ دست کپگ ءَ را ھم دل یکیمی کنگ بیت۔ آئی ءَ گوشت کہ اے پیسلہ کشت ءُُ کشاری ءِ نپ ءُُ مارکیٹ ءَ شکر ءِ وھد ءُُ پاس ءِ پھجاری ءِ واستہ کنگ بوتگ۔ دیوان ءِ بھر زوروکاں کرشنگ سیزن ءِ بندات ءِ ھوالگ ءَ کتگیں پیسلہ ءَ را وش اتک کت ءُ حکومت ءِ وھد ءُ پاس ءِ گامگیج ءَ را ساڑات۔ رانا تنویر حسین ءَ سیادی داروکیں صوبائی واکدار آناں ہدایت کت کہ آ درستیں شوگر مل آنی سر ءَ نگرانی ءَ را دل یکیمی بہ کن اَنت تانکہ کشت ءُُ کشاری ءِ ھک آنی سرجمی ءَ رکھینگ بہ بیت۔