وفاقی وزیر سینیٹر اعظم نظیر تارڑ ءَ یو این ڈی پی ءِ رہائشی نمائندہ سیموئل رزک ءَ گوں ڈل ءَ گند ءُ نند کتگ

اسلام آباد-5 نومبر (اے پی پی): وفاقی وزیر کانود، انصاف ءُ انسانی حقانی سینیٹر اعظم نظیر تارڑ ءَ چار شمبے ءِ روچ ءَ وتی ڈل ءِ گوما پاکستان ءِ واستہ اقوام متحدہ ءِ دیمروئی پروگرام ءِ نمائندہ سیموئل رزک ءَ گوں گند ءُ نند کت۔ اے موہ ءِ سر ءَ یو این ڈی پی ءِ نائب رہائشی نمائندہ وان نیوگن ھم ھوار ات۔ وزارت انسانی حقانی نیمگ ءَ چہ جاڑی بوتگیں پریس ریلیز ءِ رد ءَ گند ءُ نند ءَ انسانی حقانی وزارت، یو این ڈی پی ءُ یورپی یونین ءِ نیام ءَ کمک ءَ را گیش مھکم کنگ ءُُ پاکستان ءِ انسانی حقانی ایجنڈا ءَ را دیم ءَ برگ ءِ ھوالگ ءَ جیڈھ آنی سر ءَ ھیال ریچی کنگ بوتگ۔ وفاقی وزیر ءَ انسانی ھک آنی دیمروئی ءُ رکھینگ ءِ واستہ ادارگی، کانود ءُُ پالیسی ءِ فریم ورک ءَ را مھکم کنگ ءِ واستہ یو این ڈی پی پاکستان ءُُ یورپی یونین ءِ نیمگ ءَ چہ داتگیں برجاھیں کمک ءُُ تکنیکی کمک ءَ را ساڑات۔ آئی ءَ اے گپ ءِ سر ءَ زور پر دات کہ ’’حق پاکستان دوم‘‘ منصوبگ ءِ تہ ءَ پاکستان ءِ حکومت ءِ انسانی ھک آنی دیمروئی ءِ واستہ مھکمیں جزم ءِ درشان کنگ بیت کہ ایشی ءِ تہ ءَ آئینی گارنٹی ءُ میاں اوستمانی ذمہ واری آنی رد ءَ انت۔ دیوان ءِ ساھت ءَ اے منصوبگ ءِ چار کلیدی بھر آنی سر ءَ پیشرفت ءِ چار ءُ تپاسی کنگ بوت، ایشی ءِ تہ ءَ راجی انسانی ھک آنی ادارگ آناں مھکم کنگ، ریاستی انسانی ھک آنی چارچوب ءَ را گہتر کنگ، مزنیں وانگ ءُ زانگ ءِ ادارگ آنی تہ ءَ انسانی ھک آنی وانگ ءُُ زانگ ءِ دیمروئی ءُ کاروباری ءُُ انسانی ھک آنی ایجنڈا ءِ دیمروئی کنگ ھوار اِنت، کہ اے اقوام متحدہ ءِ کاروباری رھشونی ءِ رد ءَ اِنت۔ وفاقی وزیر ءَ را گوشت کہ منصوبگ ءِ چیر دستی ءَ انسانی ھک آنی ھال ءُُ اھوال ءِ انتظامی نظام نوکیں لیکہ آنی سر ءَ جوڑ کنگ بوھگ ءَ اِنت، وھدیکہ نیشنل میکانزم برائے نفاذ، رپورٹنگ ءُ پیلو کنگ ءِ نظام ءَ را ھم مھکم کنگ بوھگ ءَ اِنت تانکہ پاکستان میاں اوستمانی معاہدے ءِ لوٹ آناں جوانیں رنگ ءَ نفاذ ءَ را دل یکیمی بہ کنت۔ ایشی ءَ ابید اے منصوبگ ءَ چہ کاروباری ءُ انسانی ھک آنی سر ءَ راجی ایکشن پلان ءِ مھکم کنگ ءَ کمک رسیت، نجی شوبگ ءَ ذمہ واریں کاروباری رھبند، صنفی برابری ءُُ برجائی ءَ را گیش کنگ ءَ کمک رسیت۔ اے منصوبہ ءَ چہ وزارت ءَ را انسانی حقانی ڈیو ڈلیجنس فریم ورک ءِ جوڑ کنگ، نگرانی ءُ تصدیق ءِ نظام ءَ را گہتر کنگ ءُُ راجی معیار آناں میاں اوستمانی زمہ واری ءُُ جی ایس پی پلس ءِ لوٹ آنی گوما یکجا کنگ ءَ ھم کمک رسیت۔ سینیٹر اعظم نظیر تارڑ ءَ انسانی حقانی دیمروئی ءِ واستہ وزارت ءِ انسانی حقانی عزم ءِ یک رند ءَ پدر کنان ءَ گوشت کہ وزارت پالیسی اصلاحات، ادارگ ءِ مھکم کنگ ءُُ الس ءَ را سرپدی ءِ وسیلگ ءَ انسانی حق آنی رکھینگ ءَ را گیش مھکم کنگ ءِ واستہ جزم انت۔ آئی ءَ یورپی یونین ءُ یو این ڈی پی ءِ شریکداری ءُ برجاھیں کمک ءَ را ساڑات ءُ امیت سہرا کت کہ اے شریکداری ءَ چہ پاکستان ءَ انسانی ھک، چاگردی انصاف ءُ پائیداریں دیمروئی ءِ دیمروئی ءَ را گیش مھکم بیت۔