گتر ءِ نائب مزن وزیر ءُ وزیر دفاع شیخ سعود بن عبدالرحمن بن حسن بن علی الثانی ءَ گوں صدر آصف علی زرداری ءَ گوں گند ءُ نند کتگ ءُ دو نیمگی سیادی، دفاعی کمک ءُ دمگی ایمنی ءِ جیڈھ آنی سر ءَ گپ ءُ تران

دوحہ  ۔5نومبر  (اے پی پی): گتر ءِ نائب مزن وزیر ءُ وزیر دفاع شیخ سعود بن عبدالرحمن بن حسن بن علی الثانی ءَ دومی جھان ءِ چاگردی دیمروئی کانفرنس ءِ ساھت ءَ صدر آصف علی زرداری ءَ گوں گند ءُ نند کتگ ءُ دو نیمگی سیادی، دفاعی کمک ءُ دمگی ایمنی ءِ جیڈھ آنی سر ءَ گپ ءُ تران کتگ۔ چار شمبے ءِ روچ ءَ صدر گس ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر آصف علی زرداری ءَ پاکستان ءُ گتر ءِ نیام ءَ راجدپتری ءُ براتی سیادی ءَ را ساڑات ءُ گوشت کہ دوئیں ملک دفاعی، ایمنی، وانگ ءُ زانگ ءُ دفاعی بنیاتی ڈھانچگ ءِ شوبگ ءَ گہتریں کمک ءِ پابند اَنت۔ آئی ءَ اے گپ ءِ سر ءَ دل یکیمی ءِ درشان کت کہ دوئیں ملک آنی اُرد آنی نیام ءَ استیں کمک مھکم برجاہ بوھگ ءَ اِنت۔ آئی ءَ یکجائی فوجی مشق، دفاعی ٹیکنالوجی ءُ ماہرین آنی تبادلہ ءِ وسیلگ ءَ کمک ءَ را گیش پراھ کنگ ءِ ضلورت ءِ سر ءَ زور پر دات ءُ گوشت کہ اے رنگیں گامگیج خطہ ءَ امن ءُ ایمنی ءِ دیمروئی ءَ کمک رسیت۔ گتر ءِ نائب مزن وزیر شیخ سعود بن عبدالرحمن بن حسن بن علی الثانی ءَ پاکستانی اُرد آنی پیشہ وارانہ مہارت آناں ساڑات ءُ پاکستان ءِ گوما دفاعی سیادی ءَ را گیش مھکم کنگ ءِ واستہ وتی جزم ءِ پدا زور دات۔ آئی ءَ یکجائی دفاعی کوشست ءُ کوآپریٹو منصوبگ آنی تہ ءَ گتر ءِ دلگوشی ءِ درشان کت ءُ گوشت کہ گتر آیوکیں وھد ءَ اے منصوبگ آناں گیش کنگ ءِ واستہ جزمیگ اِنت۔ آئی ءَ اوگان جیڈھ ءِ تہ ءَ امن ءُ ایمنی ءِ واستہ گتر ءِ کرد ءِ برجاہ دارگ ءِ ھم دل یکیمی دات۔ صدر آصف علی زرداری ءَ برجاھیں کمک ءِ پد ءَ گتر ءِ منت گپت ءُ گوشت کہ پاکستان دفاع ءُ ایمنی ءَ ھوار جتا جتائیں شوبگ آنی تہ ءَ گتر ءِ گوما وتی اسٹریٹجک شراکت داری ءَ را گیش مھکم کنگ ءِ واستہ جزمیگ انت۔ اے موہ ءِ سر ءَ بانُک اول بی بی آصفہ بھٹو زرداری ، چیئرمین پاکستان پیپلز پارٹی بلاول بھٹو زرداری ءُ گتر ءَ پاکستان ءِ سفیر ھم ساڑی ات ۔