ریلوے ءِ وفاقی وزیر محمد حنیف عباسی    ءَ مریم اورنگزیب ءَ گوں گند ءُ نند کت، پاکستان ریلوے ءُ پنجاب حکومت ءِ کمک ءَ دیمروئی منصوبگ آنی بابت ءَ گپ ءُ تران

لاہور۔5نومبر  (اے پی پی): ریلوے ءِ وفاقی وزیر محمد حنیف عباسی    ءَ پنجاب ءِ سینئر وزیر ءِ اھوالکاری ءُ دود ءُ ربیدگ مریم اورنگزیب ءَ گوں گند ءُ نند کتگ ءُ پاک ریلوے ءُ پنجاب حکومت ءِ کمک ءَ جاری ءُ پیش کرتگیں دیمروئی منصوبگ آنی سر ءَ گپ ءُ تران کتگ۔ گند ءُ نند ءِ ساھت ءَ دوئیں بامرد آں ریلوے ءِ جتا جتائیں انفراسٹرکچر منصوبگ آنی سر ءَ چار ءُ تپاسی کت ھاسیں رنگ ءَ ھشت برانچ لائن آنی اپ گریڈیشن ءِ ھوالگ ءَ جیڈھ آنی سر ءَ چار ءُ تپاسی کت۔ اے موہ ءِ سر ءَ آہاں گارڈ ءُ غیر گارڈ لیول کراسنگ آناں ایمن جوڑ کنگ ءُ نوکیں لائن آنی تہ ءَ اپ گریڈ کنگ ءِ تہ ءَ بوتگیں پیشرفت ءِ ھم چار ءُ تپاسی کت۔ ایشی ءَ ابید پنجاب سیل ءُ سواد ءِ محکمہ ءِ کمک ءَ لاہور، راولپنڈی ءُ تکسالہ ریلوے اسٹیشن آنی زیبائی ءِ منصوبگ ءِ سر ءَ ھم سرجمیں رنگ ءَ گپ ءُ تران کنگ بوت۔ مریم اورنگزیب ءَ گوشت کہ محکمہ سیل ءُ سواد ءَ اے اسٹیشن آنی ماڈل تیار کتگ ءُ امیت انت کہ زوت عملی کار بندات کنگ بہ بیت۔ گند ءُ نند ءَ گرین کوریڈور منصوبگ ءِ دیمروئی ءِ سر ءَ ھم چار ءُ تپاسی کنگ بیت کہ شہدرہ ءَ تاں کوٹ لکھپت ریلوے ٹریک ءِ سر ءَ یک نوکیں ءُ چاگرد دوستیں منصوبگ اِنت۔ اے درگت ءَ محکمہ جنگلات ءِ کمک ءَ ریلوے لائن ءِ کش ءَ درچک جنئگ ءِ منصوبگ ءِ سرا ہم گپ ءُ تران کنگ بوت۔ دوئیں وزیر آنی نیمگ ءَ لاہور راولپنڈی فاسٹ ٹرین منصوبگ ءِ دیمروئی ءِ بابت ءَ ھم حیال ءُ لیکہ درشان کنگ بوت ءُ اے جزم ءِ درشان کت کہ اے منصوبگ زوتاں چہ زوت سرجم کنگ بیت تانکہ الس ءَ را تیز، ایمن ءُ نوکیں سفری آسراتی پجاری کنگ بہ بیت۔ گند ءُ نند ءِ گڈ ءَ مریم اورنگزیب ءُ محمد حنیف  عباسی ءَ وفاقی ءُ صوبائی تک ءَ نزیکیں کمک ءِ گوما ریلوے ءِ توامیں دیمروئی منصوبگ آناں دیم ءَ برگ ءِ سر ءَ تپاک کت۔ دوئیں رہشوناں گوشت کہ پاکستان ءِ اقتصادی برجائی ءُ الس ءِ آسراتی ءِ واستہ نوکیں، چاگرد دوست ءُ توان ءَ را دیمروئی دیگ ءِ ریلوے ءِ نظام المی انت۔