صدر آصف علی زرداری ءَ چین ءِ نائب صدر ہان ژنگ ءَ گوں گند ءُ نند

دوحہ۔5نومبر  (اے پی پی): صدر آصف علی زرداری ءَ گوشت کہ پاکستان ءُ چین آہن چکیں برات ءُ ھمک موسم ءِ اسٹریٹجک شریک انت، چین ءِ گوما دوستی پاکستان ءِ دری پالیشی ءِ مستریں ستون انت۔ آئی ءَ اے ھیالانی درشانی چار شمبے ءِ روچ ءَ چینی نائب صدر ہان ژنگ ءَ گوں تران کنان ءَ کت اَنت۔ دوئیں راہشونانی نیام ءَ گند ءُ نند دوحہ ءَ چاگردی دیمروئی ءِ بابت ءَ دومی جھان ءِ کانفرنس ءِ ساھت ءَ بوت۔ صدر ءِ مملکت ءَ ھمک مشکلیں ساھت ءَ پاکستان ءِ گوما کمک کنگ ءِ واستہ چین ءِ شگر ءُ منت گپت۔ صدر آصف علی زرداری ءَ سی پیک ءِ کامیابیں رنگ ءَ عملدرآمد ءِ تہ ءَ چین ءِ کمک ءَ را ساڑات ءُ گوشت کہ سی پیک ءِ دومی بھر مزن کوالٹی ءِ دیمروئی ءِ نوکیں دور ءَ داخل بوتگ۔ اے موہ ءِ سر ءَ چین ءِ نائب صدر ہان ژنگ ءَ صدر شی جن پنگ ءِ نیمگ ءَ چہ نیکیں واھگ آناں سر کت۔ چین ءِ نائب صدر ءَ ناشرکاری ءِ ھلاپ ءَ پاکستان ءِ کوشست ءُ دمگی ایمنی  ءِ تہ ءَ پاکستان ءِ کرد ءَ را ساڑات۔ چینی نائب صدر ءَ گوشت کہ سی پیک ءِ دومی بھر ءَ چین پاکستان ءِ دیمروئی ءِ واستہ کمک ءَ برجاہ دار ایت۔ آئی ءَ گوشت کہ دیمروئی منصوبگ آنی تہ ءَ ٹرانسپورٹ، انفراسٹرکچر، آئی ٹی، کشت ءُ کشار ءُ پیشہ وارانہ تربیت ءِ وڑیں شوبگ ھوار بنت۔ دوئیں بامرد آں وت مہ وتی بھروسہ، احترام ءُ دمگی وشھالی ءِ وژن ءِ بنیات ءَ سیادی ءَ را گیش مھکم کنگ ءِ جزم ءِ درشان کت۔ دوئیں ملک آں دمگی ءُ جہانی فورم آنی تہ ءَ نزیکیں کمک ءِ برجاہ دارگ ءِ سر ءَ ھم تپاک کتگ۔