بنجائی وزیر مواصلات عبدالعلیم خان نا اسلام آباد مری ایکسپریس وے انا دورہ

اسلام آباد۔ 05 نومبر (اے پی پی) بنجائی وزیر مواصلات عبدالعلیم خان برجاشونداری کاریم و ڈٹ آتا پوروی نا گڈیکو ریسہ غاتا جاچ ءِ ہلنگ کن اسلام آباد مری ایکسپریس وے نا دورہ ءِ کرے۔ وزارت مواصلات آن جاری بیان نا رداٹ وزیرمواصلات ڈٹ انا جم پیش رفت و آب آ است جمی نا درشانی ءِ کرے و نیشنل ہائی وے اتھارٹی (این ایچ اے) نا ٹیم انا ستاءِ کرے  ہرا اسلام آباد مری ایکسپریس وے ءِ جہانی آب انا رداٹ پوسکن شاہراہ ٹی بدل کرینے۔ اوپارے کہ دا شاہراہ ہرسال لکھ آ سیل و سواتی تے ملک انا پنی سیل و سواتی ہند مری اسکان دیک اودے پین رکھ و آرام دہ سفر کن پوسکن آسراتی تیان شپ کننگانے۔ عبدالعلیم خان پارے کہ مچ آ ایکسپریس وے آ پوسکن طرز انا لائٹنگ سسٹم خلنگانے ہراڑآن نن نا وخت سفر پین رکھ و آسان مسنے، رکھی بست وبند آتیٹی ہم ودکی کننگانے وخت اس کہ موٹروے پولیس نا تعیناتی آن ٹریفک نا بہاؤ و مسافر آتا راہشونی ءِ پین گچین کننگانے۔ وزیر مواصلات پارے کہ مسافر آتا آسراتی کن پوسکن و پورو آسراتی تیان شپ ریسٹ ایریاز ہم جوڑ کننگانے۔ اوپارے کہ ڈٹ پوروی نا خڑک ءِ و اونا باضابطہ بناءِ وزیراعظم محمد شہباز شریف زوت کیک۔ عبدالعلیم خان پارے کہ دا ڈٹ ملک اٹی جہانی آب انا انفراسٹرکچر نا فراوانی ، سیل و سوات نا مون آ دننگ و الس ءِ گچین سفری آسراتی تننگ نا حکومتی عزم انا ڈیک ءِ ہراڑآ اولیتی بنداوتیا کاریم برجاءِ۔