صدر مملکت آصف علی زرداری نا چین نا نائب صدر ہان ژنگ تون اوڑدہی

دوحہ۔ 05 نومبر (اے پی پی) صدر مملکت آصف علی زرداری پارینے کہ پاکستان و چین آہنی ایلم و ہرموسم نا سٹریٹجک شریدار ءُ، چین اتون سنگتی پاکستان نا خارجہ پالیسی نا بنداوی تمبہ ءِ۔ داخیال آتا درشانی ءِ او چارشنبے نادے آ داڑے چین نا نائب صدر ہان ژنگ تون اوڑدہی ٹی گپ وتران کرساکرے۔ ہڑتوم آ راہشون تا نیام اٹ دااوڑدہی دوحہ ٹی برجا راجی شونداری نا بابت ارٹ میکو جہانی کانفرنس نا وخت آ مس۔ صدر مملکت چین نا کنڈآن ہرمشکل ساہت اٹی پاکستان تون کمکاری آمنت واری ءِ ہرفے۔ صدر آصف علی زرداری سی پیک نا سرسہب نفاذ اٹی چین نا کمکاری نا ستاءِ کرسا پارے کہ سی پیک نا ارٹ میکو ریسہ بڑزکو آب انا شونداری نا پوسکن آ دوراٹی پترینگانے ۔ داوخت آ چین نا نائب صدر ہان ژنگ صدر شی جن پنگ نا کنڈآن نیک است خواہی تے سرکرے۔ چینی نائب صدر پاکستان نا دہشت گردی نا برخلاف کوشست و علاقائی امن کن کڑد انا ستاءِ کرے۔ چینی نائب صدر پارے کہ چین سی پیک نا ارٹ میکو ریسہ ٹی پاکستان نا شونداری ٹی کمکاری ءِ برجاتخک۔ اوپارے کہ شونداری نا ڈٹ ٹرانسپورٹ، انفراسٹرکچر، آئی ٹی ، کشت وکشار و ووکیشنل تربیت کون آ بشخ آتیٹی اوار مریرہ۔ ہڑتوم آ راہشونک تین پہ تینی پت، شرف و علاقائی شونہالی نا وژن آتالان تعلقداری پین سوگو کننگ نا عزم انا درشانی ءِ کریر۔ ہڑتوم آملک آک علاقائی و جہانی فورم تیا خڑکی کمکاری ءِ برجاتخنگ آہم امنا کریر۔