اصلاحات نا ایجنڈا، مالی نظم و ضبط و سٹریٹجک شریداری تا مسخت ملک انا زرگزرانی سمت ءِ اول سرآن متعین کننگ ءِ، وزیرخزانہ محمد اورنگزیب

کراچی۔ 05 نومبر (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ اصلاحات نا ایجنڈا، مالی نظم و ضبط و سٹریٹجک شریداری تا مسخت ملک انا زرگزرانی سمت ءِ اول سرآن متعین کننگ ءِ، ورناتے ڈیجیٹل و ٹیکنیکل مہارت آتیان شپ کننگ المی ءِ، آبادی ٹی ترند رفتار ودکی و چاگڑدی بدلی پاکستان کن اِرا بھلو وجودی چیلنج ءُ ہرافتے تون مون تننگ کن گام گیج المی ءِ۔ داخیال آتا درشانی ءِ او ’’فیوچر سمٹ‘‘ آن تران کرساکرے۔ وزیرخزانہ پارے کہ تدوک آ منہ ہفتہ ٹی او واشنگٹن و ریاض اٹی اوڑدہی کرینے، جہانی زرگزرانی بحالی نا عمل برجاءِ و اونا نتیجہ ٹی گڑاس زرگزرانی ٹک آتیٹی گچینی ہم بننگ ءِ، دنیا نا کیہی ملک آتیٹی بنداوی پنجر جاتی اصلاحات آ عملدرآمد مننگ ءِ و اونا نتیجہ ٹی نجی بشخ قائدانہ کڑد اکن مون آبننگ ءِ، مصنوعی ذہانت و ٹیکنالوجی آ تالان جدت نا وارخواہی تیان پبی فائدہ ہرفسا پیدواریت آ تالان اقتصادی شونداری و نمو آ چکار کننگ نا گرج ءِ۔ وزیرخزانہ پارے کہ سیاسی و جغرافیائی عوامل و بے چیٹی، پروٹیکشن ازم، جہانی آرڈر اٹی بدلی و سپلائی چین نا اڑاند آتا سوب آن بے یقینی نا کیفیت مریک، پاکستان تون اوار مون آ بروک زرگزران تے دارداٹ محتاط طرز عمل نا درشانی ءِ کروئی مریک تانکہ زرگزرانی لوڈوتا مقابلہ ءِ کننگ مرے۔ وزیرخزانہ پارے کہ ملکی زرگزران سوگو ءِ، کلیدی ریٹنگ ایجنسی تا کنڈآن پاکستان نا کریڈٹ ریٹنگ اٹی گچینی و آئی ایم ایف پروگرام نا رداٹ سٹاف لیول معاہدہ غان ملکی زرگزران، پالیسی و سمت آ پیشن نا پت انا عکاسی مننگ ءِ۔