پاکستان ءِ شمولیت ءُ مھکمیں دیمروئی ءِ وژن دوحہ ءِ جار  ءِ رد ءَ انت، صدر آصف علی زرداری ءَ جھان ءِ سروک دیوان ءَ گوں تران

دوحہ/اسلام آباد۔4نومبر  (اے پی پی): صدر آصف علی زرداری ءَ چاگردی انصاف، ھواریں دیمروئی ءُ جھان ءِ یکجاھی ءِ واستہ پاکستان ءِ جزم ءِ سر ءَ زور پر دات ءُ گریبی ءِ ھلاسی، شرپداریں کار ءِ دیمروئی ءُ درست آنی واستہ برابری ءُ انسانی ھک آنی دل یکیمی کنگ ءِ ضلورت ءِ سر ءَ زور پر دات۔ صدر ءِ مملکت سئے شمبے ءِ روچ ءَ قطر ءِ بنجاھی شہر دوحہ ءَ چاگردی دیمروئی ءِ واستہ دومی جھان سروک دیوان ءَ گوں گشتانک دیگ ءَ ات۔ دوحہ ءِ جار ءِ سرجمیں کمک ءِ درشان کنان ءَ صدر ءِ مملکت ءَ گوشت کہ پاکستان ءِ ھواریں ءُ برجمیں دیمروئی ءِ وژن دوحہ ءِ جار ءِ روح ءِ رد ءَ انت۔ آئی ءَ گوشت کہ پاکستان وتی پالیشی آنی تہ ءَ الس ءَ را مرکز ءَ ایر کنگ ءِ سر ءَ یک جیڈھ آں ۔ صدر ءِ مملکت ءَ پاکستان ءِ دیمروئی ءِ سرا مبنی انکم سپورٹ پروگرام ءِ حوالہ دات کہ ایشی ءَ مالی کمک، جان سلامتی ءُ وانگ ءُ زانگ ءِ وسیلگ ءَ 9 ملین ھاندان آناں بااختیار جوڑ کتگ۔ آئی ءَ گوشت کہ اے گامگیج ءَ را چاگردی رکھینگ ءِ جوانیں ماڈل آنی تہ ءَ یک ءِ رنگ ءَ جھان ءِ تک ءَ منگ بیت۔ صدر آصف علی زرداری ءَ مھکمیں دیمروئی ءِ مول ءُ مراد آنی سر ءَ پاکستان ءِ جزم ءِ پدر کنگ ءَ گوشت کہ آیوکیں پنچ سال آنی تہ ءَ وانندگی ءِ شرح 90درسد ءَ سر کنگ بیت ءُ ھر زھگ وانگجاہ ءَ روگ ءِ موہ رس ایت۔ صدر ءِ مملکت ءَ نیشنل یوتھ انٹرنشپ پروگرام ءُ گرین اینڈ ریزیلنٹ ہاؤسنگ پروجیکٹ آنی ھم ذکر کت کہ ایشی ءِ مول ءُ مراد مینگرو ءِ بحالی ءُ فطرت ءِ سر ءَ بنیات ءِ وسیلگ ءَ ورنا آناں بااختیار جوڑ کنگ ءُ موسمیاتی لچک ءَ را مھکم کنگ ءِ گامگیج اَنت۔ صدر ءِ مملکت ءَ آپ ءِ سلاہ ءِ رنگ ءَ کارمرد کنگ ءُ سندھ ءِ آپانی معاہدے ءِ ھلاپ ورزی ءِ سر ءَ ھم سک باز جیڈھ ءِ درشانی کت ءُ ایشی ءَ را پاکستان ءِ 240ملین مردم آنی واستہ مزنیں ھترہ لیک اِت۔ آئی ءَ گوشت کہ دوحہ ءِ جار ءِ سر ءَ عمل کنگ ءِ واستہ جھان ءِ مالیاتی اصلاحات، قرضہ ءِ ریلیف، منصفانہ ٹیکس ءُ پراھ ءُ شاھگانیں چاگردی رکھینگ ءِ ضلورت اِنت ءُ دگنیا ءَ را شرپ، برابری ءُ یکوئی ءِ سئے ستون آنی کش ءُ گور ءَ یکجا بوھگی اِنت۔ صدر ءَ فلسطین ءَ نسل کشی، لگت مالی  ءُ مزنیں کساسے ءَ بزگری  ءِ مذمت کتگ ءُ عادلانہ ءُ دائمی امن ءِ لوٹ کتگ۔ آئی ءَ کشمیری الس ءِ واستہ پاکستان ءِ بے دروریں کمک ءِ یک رندے پدا گوشت کہ انصاف ءِ جہد ءُ وت واجہی ءِ حق دوئیں یکیں سکہ ءِ دو نیمگ اَنت۔ صدر آصف علی زرداری ءَ گوشت کہ دیمروئی الس ءِ گہتری ءَ چہ بندات بہ بیت ءُ آسر بہ بیت۔ آئی ءَ گوشت کہ ما چہ ھرچ اختلاف ءَ بُرز بہ بئیں ءُ شفقت ءُ دیمروئی ءِ راہ ءَ بہ رو ایں ۔