آخبت نا دوئی کننگ بیرہ پائیدار شونداری نا کمک اٹ ممکن ءِ، بنجائی وزیر ڈٹ بندی احسن اقبال

اسلام آباد۔ 04 نومبر (اے پی پی) بنجائی وزیر ڈٹ بندی ، شونداری و خصوصی گام گیج پروفیسر احسن اقبال پارینے کہ سویلی ایشیاٹی کم و ود 380 ملین بندغ نیزگاری نا گواچی ءُ و ڈیہہ موسمیاتی بدلی تا سنگین چیلنج آتا گواچی ءِ، بھلو کچ اسے ٹی چناک غذائی کاختی و تعلیم آن محرومی تون مون تننگ ءُ۔ او اسلام آباد اٹی پالیسی ادارہ پائیدار شونداری(ایس ڈی پی آئی) نا 28 می سالانہ پائیدار شونداری کانفرنس آن تران کریکہ ہرانا سرحال ’’مون آ بروک دنیا ٹی پائیدار شونداری نا غیرمرتب و مرتب پیمانہ‘‘ ءِ۔ چار دے ئی کانفرنس اٹی 45 آن زیات دیوان مریک ہرافتے ٹی پارلیمان نا باسک، زرگزران نا چاہندار ، جہانی چاہندار چاگڑد و سفارت کار بشخ ہلنگ ءُ۔ بنجائی وزیر پروفیسر احسن اقبال پارے کہ پاکستان برجاسال ترند نوکاپی حالیت آتا گواچی مس، ہراٹی موسمیاتی بدلی تون اوار اوار گڑاس وخت آبی جارحیت نا اثرآک ہم اوار مریرہ۔ نارووال اٹی بروک آنوکاپ اونا اسہ پیدوار ءُ درور اسے۔ احسن اقبال پارے کہ یواین نا رپورٹ نا رداٹ پائیدار شونداری نا بیرہ 17 درسد ہدف سہی سمت آ ہِننگ ءِ۔ دارداٹ کلائمیٹ فنانس نا انصاف اٹ بشخنگ بے کچ المی ءِ تانکہ پدتموک ملک آک دا بابت تینا ہدف آتے دوئی کننگ کیر۔