پاکستان وعرب اسلامی ملک آک غزہ ٹی امن کن خلوص نیت اٹ کوشست کننگ ءُ، محمد اسحاق ڈار

اسلام آباد۔ 04 نومبر (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ پاکستان وعرب اسلامی ملک آک غزہ ٹی امن کن خلوص نیت اٹ کوشست کننگ ءُ، دنیا تون ہم گام سلنگ کن پین ودکی رفتار اٹ مون آ ہنوئی مریک، ننا پالیسی شفافیت ءِ پک کننگ و پاکستان اٹ جہانی زرکاری ءِ ودفنگ ءِ۔ داخیا ل آتا درشانی ءِ او سے شنبے نادے آداڑے گوگل کروم بک اسمبلی لائن نا دود آن تران کرساکرے۔ اوپارے کہ ننے انسانیت ءِ بچفنگ کن پبی کوشست کروئی مریک، امریکی صدر ڈونلڈ ٹرمپ انا ساڑی گری ٹی غزہ امن معاہدہ غا دستخط مس۔ نائب وزیراعظم پارے کہ حکومت پاکستان ڈیجیٹلائزیشن نا کنڈآن گامزن ءِ، نن ٹیکنالوجی ٹی بھاز شون ہلنگ اُن، وزارت آئی ٹی نا کوشست آتا اینو بھرم ملنگ ءِ۔ اوپارے کہ حکومت ڈیجیٹل پاکستان جوڑ کننگ کن پبی گام گیج کرینے۔ مسکوہی دو راٹی حکومت اٹی ہمووخت نا وزیراعظم محمد نواز شریف نا کماشی ٹی فورجی ٹیکنالوجی درستی راستی کرفنگا۔ نائب وزیراعظم پارے کہ ننا پالیسی شفافیت ءِ پک کننگ و پاکستان اٹ جہانی زرکاری ءِ ودفنگ ءِ، نن خراج نا عوامل ءِ منظم کننگ کن گام گیج کرینن، دا ننا ڈیجیٹل حکمت عملی تون ہم گرنچ ءِ۔ مصنوعی ذہانت وخت انا اہم گرج گوندسا نائب وزیراعظم پارے کہ ننے دنیا تون ہم گام سلنگ کن پین ودکی رفتار اٹ مون آ ہنوئی مریک۔ اوپارے کہ پوسکن آ دور اٹی پوسکن آ علم ءِ ہیل کننگ المی ءِ۔ سینیٹر محمد اسحاق ڈار پارے کہ تدوک آ منہ سال اٹی حکومت ڈیجیٹل پاکستان جوڑ کننگ کن کیہی اہم گام گیج کرینے، پالیسی ریٹ اٹی کمتی آن زرکاری ءِ فائدہ مننگ ءِ، ننا ورناچین نا مہارت ءِ ودفنگ اٹ گوگل کروم بک اہم کڑد ادا کیک، مارکیٹ اٹی کروم نا دستیابی ساڑی آ گیجٹس نا فراوانی ءِ پین آسان کیک۔