خصوصی کمکار ہارون اختر خان ناپاکستان انڈسٹریل ڈیولپمنٹ کارپوریشن نا دورہ

اسلام آباد۔ 04 نومبر (اے پی پی) وزیراعظم نا خصوصی کمکار صنعت وپیداوار ہارون اخترخان سے شنبے نادے آ پاکستان انڈسٹریل ڈیولپمنٹ کارپوریشن (پی آئی ڈی سی) نا دورہ ءِ کرے۔ داوخت آ چیف ایگزیکٹیو آفیسر پی آئی ڈی سی ادارہ نا کارکڑد، برجاڈٹ و آخبت نا لائحہ عمل آتیا سرجمی اٹ حوال تس۔ دیوان اٹی کراچی انڈسٹریل پارک اناماسٹر پلان، بن قاسم انڈسٹریل پارک، لینڈ لیز پالیسی و کسٹم بونڈ ویئرہاؤس نا جوڑ کننگ نا امور آ سرجمی اٹ گپ وتران کننگا۔ ہارون اخترخان داوخت آپارے کہ پی آئی ڈی سی ملکی صنعتی پنجراٹی تمبہ نا حیثیت تخک ، ہرا صنعتی شونداری، روزگار نا وارخواہی و برآمد آتا مون آدننگ اٹ اہم کڑد ادا کننگ ءِ۔ اوپارے کہ وزیراعظم شہباز شریف نا وژن اسہ سوگو صنعتی بنداواس جوڑ کننگ و ہندی ودرملکی زرکاری ءِ مون آدننگ ءِ۔ اوپارے کہ کراچی انڈسٹریل پارک انا جوڑ کننگ آن ملکی برآمد آتیٹی خاطرخواہ ودکی مریک و زرکاری نا پوسکن آ درگہ غاک ملنگرہ۔ ہارون اخترخان مستی پارے کہ پوسکن آ انڈسٹریل پالیسی نا رداٹ ہندی صنعت آتے زیات آسراتی فراوان کننگک تانکہ پاکستان نا صنعتی بشخ پوسکن آخواست آتون ہم گرنچ مننگ کے۔ خصوصی کمکار دا عزم انا درشانی ءِ کرے کہ پی آئی ڈی سی نا رداٹ برجاڈٹ آتیٹی شفافیت ، کارکڑد و رفتار اٹی گچینی اتنگ حکومت نا اولیت ءِ۔ اوپارے کہ حکومت صنعتی بشخ اٹی اصلاحات و پوسکن آ آسراتی تا فراوانی کن سنبرینگوک ءِ ، تانکہ نجی بشخ ءِ شونداری کن سازگار چاگڑد فراوان کننگ مرے۔ ہارون اخترخان پارے کہ پی آئی ڈی سی نا کڑد ءِ پین گچین کننگ کن جوان حکمت عملی آ کاریم برجاءِ،  ہرا صنعتی زون تیٹی زرکاری نا پوسکن وارخواہی ودی کننگ و قومی زرگزران ءِ سوگو کننگ اٹ کمکار مریک۔