دوحہ امن معاہدہ نا روح پامال، اوغانستان دہشت گرد آتا آماجگاہ برقرار، اوغان طالبان تا سیخاٹی فتنۃ الخوارج و ایلو دہشت گرد تنظیمک منظم وڑاٹ سرگرم ءُ

اسلام آباد۔ 04 نومبر (اے پی پی) طالبان تا اقتدار اٹی اوغانستان دہشت گرد تنظیم تیکن محفوظ پناہ گاہ جوڑ مسنے، اوغان طالبان تا سیخاٹی فتنۃ الخوارج و ایلو دہشت گرد تنظیمک منظم وڑاٹ سرگرم ءُ۔ سرجم حوال آتا رداٹ دوحہ امن معاہدہ نا رداٹ اوغان طالبانک تینا گل زمین ءِ دہشت گردی و سرحد پار دراندازی کن کاریم اٹ اتپننگ نا باوری کرفیسر ولے معاہدہ نا خلاف ورزی ءِ کرسا اوغانستان اٹی ساڑی دہشت گرد آتا رکھ پناہ گاہ تے پاکستان نا برخلاف پدریسہ کاریم اٹ اتنگ انگ ءِ۔ اقوام متحدہ نا مانیٹرنگ ٹیم رپورٹ نا رداٹ اوغانستان اٹی دہشت گرد تنظیم تا سرجزآک خطرناک حداسکان ودانو، طالبان حکومت و القاعدہ نا تعلقداری نئے بیرہ برقرار ءِ بلکن مہالو آن زیات فعال ءِ، ایمن الظواہری نا کابل اٹی زوال پک کرے کہ القاعدہ داسہ ہم اوغانستان اٹی ساڑی ءِ۔ رپورٹ نا رداٹ دا کیمپ آتیان دہشت گرد زابل، وردک، قندھار، پکتیاو ہلمند نا کسر آتیان بلوچستان اٹی داخل مریرہ، فتنۃ الخوارج نا سرکڑدہ غاتے اوغان گل زمین آ پورو پناہ، وسیلہ و مالی کمکاری دوئی ءِ، طالبان حکومت ہر تُو فتنۃ الخوارج نا سروک نور ولی محسود ءِ 50ہزار 500 ڈالر فراوان کیک۔ رپورٹ اٹی پاننگاکہ خارجی نور ولی محسود نا کوزہ ٹی امریکی فوج انا ہلوک آ پوسکن آ سلہہ ہم ساڑی ءِ، جعفر ایکسپریس دھماکہ و ژوب کنٹونمنٹ جلہو آتیٹی ہم اوغانستان نا برخلاف ناقابل تردید شاہدی ساڑی ءِ۔ پاکستان انسٹی ٹیوٹ فار پیس سٹڈیز نا حساب وکتاب نا رداٹ ملک اٹی دہشت گردی نا واقعہ غاتیٹی بھلو حداسسکان ودکی مسنے، وخت بسنے کہ جہانی واکدار آک دوحہ معاہدہ نا فریم ورک نا رداٹ اوغان طالبان تیا سخت پابندی خلیر۔