بلیو اکانومی ملک انا اقتصادی شونداری کن گیم چینجر اس جوڑ مننگ کیک، حکومت پالیسی تا چرجوئی، زرکاری نا مون آ دننگ و پائیدار بحری شونداری کن سنبرینگوک ءِ، بنجائی وزیر خزانہ سینیٹر محمد اورنگزیب

اسلام آباد۔ 04 نومبر (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ بلیو اکانومی ملک انا اقتصادی شونداری کن گیم چینجر اس جوڑ مننگ کیک، حکومت پالیسی نا چرجوئی، زرکاری نا مون آ دننگ و پائیدار بحری شونداری کن سنبرینگوک ءِ تانکہ دا بشخ ءِ سال 2047اسکان 100 ارب ڈالر نا زرگزران اٹی بدل کننگ مرے۔ اوداہیت ءِ پاکستان انٹرنیشنل میری ٹائم ایکسپو اینڈ کانفرنس نا بنائی دیوان آن بطور مہمان خاص ورچوئل تران کرساپارے۔ دا دود کراچی ایکسپو سینٹر اٹی پاکستان نیوی و وزارت بحری امور نا شریداری اٹ اڈتننگا۔ وزیرخزانہ پاکستان نیوی، وزارت بحری امور و نیشنل انسٹیٹیوٹ آف میری ٹائم افیئرز ءِ جہانی آب انا کانفرنس اڈتننگ نا ستاءِ کرے و پارے کہ سمندری زرگزران پاکستان کن شونداری نا پوسکن ءُ درگہ ملنگ کیک۔ اوبشخ ہلوک، چاہندار و پینلسٹ خواجہ غاتا خیرمقدم ءِ کرے۔ تینا تقریر اٹی وزیرخزانہ پارے کہ تدوک آ دونیم سال اٹی پاکستان زرگزران نا سوگوی نا سمت نمان پیش رفت کرینے۔ زرمبادلہ نا کوڑی 14 ءُ نیم ارب ڈالر آن گدرینگانے، افراط زر سنگل ڈیجٹ اٹ بسنے و روپئی نا قدر سوگو ءِ۔ اوپارے کہ پالیسی ریٹ اٹی کمتی و جہانی ریٹنگ ایجنسی تا کنڈآن پاکستان نا زرگزران ءِ سوگو گوندنگ جہانی پت انا درشانی ءِ۔ وزیرخزانہ پارے کہ آئی ایم ایف تون ساڑی آ سٹاف لیول معاہدہ حکومت نا پالیسی تیا جہانی ادارہ غاتا پت انا چیدہ ءِ۔ اوپارے کہ پاکستان داسہ اسہ ہندن ءُ ریسہ سے آ ٹی ءِ ہراڑے روایتی سیوتی ملک چین، امریکہ، سعودی عرب و متحدہ عرب امارات تون تعلقداری ءِ واپاری و زرکاری نا بشخ اٹی عملی کمکاری ٹی بدل کننگ مریک۔ سینیٹر محمد اورنگزیب پارے کہ فی الحال سمندری زرگزران نا ملکی جی ڈی پی ٹی بشخ بیرہ 0.4 آن 0.5 درسد یا کم  وود اسہ ارب ڈالر ءِ ولے داٹی بے پناہ گمان پوشیدہ ءِ۔