سعودی وزارت جان جوڑی کینسر، پِف ، است و بِک آتون اوار گڑاس پین مرض آتیٹی اختہ مریض آتیا حج 2026 آ پابندی خلکنے، ترجمان وزارت مذہبی امور

اسلام آباد۔ 04 نومبر(اے پی پی) وزارت مذہبی امور پارینے کہ سعودی عرب نا وزارت جان جوڑی کینسر، پِف، است و بِک آتون اوار گڑاس پین مرض آتیٹی اختہ مریض آتیا حج 2026 نا پابندی خلکنے، خلاف ورزی و غلط بیانی کروک آ بندغ آتے اوفتا تینا خڑچہ غا پدی گدریفنگک۔ داہیت ترجمان وزارت مذہبی امور ’’اے پی پی‘‘ تون گپ وتران اٹی پارے۔ اوپارے کہ سعودی وزارت جان جوڑی حج 2026 نا حاجی تیکن المی طبی پارت و شڑت عائد کرینے ہرافتا رداٹ بِک آتا مرض و ڈائیلاسز کرفوک آناجوڑ، است، پِف ، کینسر ، نفسیاتی مرض، پِیری، الزائمر  ، حمل نا آخیریکو مسہ تُو و خرہ ٹٹ تون اوار فعال متعدی مرض آتیٹی اختہ بندغ آتیکن حج 2026 نا پابندی خلنگانے۔ ترجمان پارے کہ طبی سرٹیفکیشن جاری کروک آ ڈاکٹر آتے پارت کننگانے کہ او پورو چھان بین آن پد جان جوڑی نا سرٹیفکیٹ جاری کیر اگہ دا مرض آتیٹی اختہ بندغ غلط بیانی نا سوب آن حج اکن سعودی عرب آ سرمس تو داوڑنا بندغ ءِ اونا تینا خڑچہ غا پدی گدریفنگک۔ اونا پاننگ ئس کہ حاجی کیمپ آتیٹی ویکسین خلفنگ نا وخت آہم اگہ کس اسے ٹی دامرض آتا نشانی ظاہر مس تو اودے حاجی کیمپ اٹی ساڑی میڈیکل آفیسر ہم توننگ نا مجاز مریک۔