صدر مملکت آصف علی زرداری مسہ دےئی سرکاری دورہ غا قطر انا دارالحکومت دوحہ غا سرمس

دوحہ۔04 نومبر (اے پی پی) صدر مملکت آصف علی زرداری مسہ دے ئی سرکاری دورہ غا قطر انا دارالحکومت دوحہ غا سرمس، حماد انٹرنیشنل بالی پٹ آ صدر مملکت و اونا ڈل ءِ بخیر سینئر قطری کمامدار و دوحہ ٹی تعینات پاکستان نا سفیر ئسک کریر، اوصدر مملکت ءِ گلدستہ اس ہم پیش کریر ۔ ایوان صدر نا پریس ونگ آن جاری بیان نا رداٹ دورہ ٹی صدر آصف علی زرداری جہانی راجی شونداری کانفرنس اٹی بشخ ہلیک۔ تینا اہم تران اٹی صدر مملکت جہانی برادری ءِ راجی شونداری و جوان زرگزرانی نمو نا بابت پاکستان نا گام گیج آتیان معلومدار کیک۔ صدر آصف علی زرداری راجی رکھ، نیزگاری ٹی کمتی و نزور تپہ غاتے سوگو کننگ اٹ بینظیر انکم سپورٹ پروگرام نا کڑد ءِ مون آتخک۔ صدر مملکت دوحہ الائنس ، سوشل پروٹیکشن اینڈ جابز کمپیکٹ نا بناکن پاکستان نا گام گیج و جہانی شونداری قول آتون ہم گرنچ ڈٹ آتیا ہیت کیک۔ صدر مملکت راجی و چاگڑدی بدلی تیکن مالی وسیلہ غاتا دوئی کننگ، ایس ڈی جی سٹمولس و ایلو جہانی گام گیج آتا اہمیت آ زور شاغک ۔ صدر آصف علی زرداری تینا دورہ ٹی چندی جہانی و علاقائی راہشون و جہانی تنظیم آتا نمائندہ غاتون اوڑدہی ہم کیک۔