پاکستان و ترکیہ نا وزیرواپار آتا اوڑدہی، ہڑتوم آکنڈآتا واپار ءِ مون آ دننگ آ امنا

استنبول ۔ 03 نومبر (اے پی پی) بنجائی وزیر واپار جام کمال خان سٹینڈنگ کمیٹی فار اکنامک اینڈ کمرشل کوآپریشن آف دی آرگنائزیشن آف دی اسلامک کوآپریشن (COMCEC)نا 41 می دیوان نا وخت  آ استنبول اٹی ترکیہ نا وزیر واپار پروفیسر ڈاکٹر عمر بولات تون اوڑدہی کرے۔ دوشنبے نادے آ داڑے جاری پریس ریلیز نا رداٹ اوڑدہی ٹی ہڑتوم آ وزیرآک ایلم ملک آتا نیام اٹ واپاری و اقتصادی کمکاری ءِ پین سوگو کننگ نا وڑوڈول آتیا گپ وتران کریر۔ ترکیہ نا وزیر واپار پروفیسر ڈاکٹر عمر بولات پاکستان تون واپاری تعلقداری تے ودفنگ و ہڑتوم آکنڈآتا اقتصادی رابطہ غاتے ودفنگ نا تینا حکومت نا بھاز است خواہی نا درشانی ءِ کرے۔ اوباور کرفے کہ ترکیہ واپاری مذاکرات نا بروک آ دور اٹی پاکستان نا سلاہ تا جوان وڑاٹ جاچ ءِ ہلیک۔ بنجائی وزیر جام کمال خان تینا ترک ہم منصب ءِ زیراعظم محمد شہباز شریف نا کماشی ٹی حکومت پاکستان نا کنڈآن کارکڑد، شفافیت ءِ پک کننگ و نظام اٹی زرکارآتا پت ءِ ودفنگ کن کروک آ اصلاحات و گام گیج آتیان معلومدار کرے۔ اوداہیت آ زور شاغا کہ پاکستان چندی بشخ آتیٹی ترک زرکاری کن اسہ اومیت افزا مزل اسے نا وڑاٹ مون آ بننگ ءِ۔ پروفیسر ڈاکٹر بولات حلال واپار و تعلقدار صنعت آتیٹی کمکاری ءِ گہرا کننگ نا اہمیت آ زور شاغسا وزیرجام کمال خان ءِ 25 نومبر آن استنبول اٹی اڈ ہلوک بروک آ حلال ایکسپو ٹی بشخ ہلنگ نا سلہ ہم خلک۔ ہڑتوم آ کنڈآک ساڑی آ شریداری ءِ سوگو کننگ وواپار ، زرکاری و صنعتی شونداری ٹی کمکاری کن پوسکن ءُ کسر پٹنگ نا عزم انا درشانی ءِ کریر ہرا پاکستان وترکیہ نا نیام اٹ خڑکی و برادرانہ تعلقداری نا عکاسی ءِ کیک۔