جمہوریت ءِ رکھینگ ءُ قانون ءِ حاکمیت ءِ رکھینگ ءِ واستہ آزات، زمہ وار ءُ ایمن احوالکاری المی انت، یوسف رضا گیلانی

اسلام آباد۔2نومبر  (اے پی پی):چیئرمین سینیٹ سید یوسف رضا گیلانی ءَ گوشت کہ پریس ءِ آجوئی، اھوالکار آنی ایمنی ءِ رکھینگ ءُ میڈیا ءِ کارندہ آنی ھلاپ ءَ بوتگیں جرم آنی احتساب ءَ را دل یکیمی کنگ سینیٹ ءِ مھکمیں اولیت ءُ بے دروریں عزم اِنت۔ یک شمبے ءِ روچ ءَ اھوالکار آنی ھلاپ ءَ جرم آناں ھلاسی ءِ میاں اوستمانی روچ ءِ موہ ءَ وتی کلوہ ءِ تہ ءَ چیئرمین ءَ اے گپ ءِ سر ءَ زور پر دات کہ شفافیت، احتساب ءُ الس ءِ سرپدی ءَ را گیش کنگ ءِ وسیلگ ءَ جمہوریت ءِ مھکم کنگ ءَ اھوالکار سک باز ارزشتی ایں کرد پیلو کن اَنت۔ آئی ءَ گوشت کہ اھوالکار آنی راستی ءِ شوھازگ ءِ تہ ءَ ھمت ءُ فرض ءِ احساس آھاں باز براں مزنیں ھترہ آنی آماچ کنت، پمیشکا آھانی جان سلامتی ریاست ءُ چاگرد ءِ یکجائی ذمہ واری اِنت۔ آئی ءَ جھان ءِ تک ءَ اھوالکار آنی سر ءَ زھر ءُ زھرشانی، دھمکی ءُ زوراکی ءِ گیش بوھوکیں وئیل آنی سر ءَ سک باز جیڈھ ءِ درشانی کنان ءَ گوشت کہ اے وڑیں جرم آنی تہ ءَ ھواریں مردمانی سزا ءِ رد کنگ انصاف ءِ رد کنگ اِنت، جمہوری ادارگ آناں نزور کنت ءُ اظہار ءِ آجوئی ءَ را بے توار کنگ ءِ برابر اِنت۔ چیئرمین سینیٹ ءَ گوشت کہ ایوان بالا ءَ اھوالکار آنی سر ءَ ھمک رنگ ءِ زوراکی ءُ پریشر ءِ پندل آنی سر ءَ سک مذمت کتگ۔ میڈیا ءِ پیشہ وراں نشانگ جوڑ کنگ ءِ جرم آنی ھوالگ ءَ صفر رواداری ءِ پالیسی ءِ سرا عمل کنگ بہ بیت۔ جمہوریت ءُ قانون ءِ حاکمیت ءِ رکھینگ ءِ ھاترا آزات، ذمہ وار ءُ ایمنیں صحافت ناگزیر اِنت۔ آئی ءَ انسانی ھک ءُ اظہار ءِ آجوئی ءِ میاں اوستمانی رہبندانی برجائی ءِ وتی عزم ءِ پدا زور دات ءُ سیادی داروکیں ریاستی ادارگ، سول سوسائٹی ءُ میاں اوستمانی براتی ءَ را زور پر دات کہ آ انچیں گامگیج بہ زور اَنت کہ احوالکار وتی زمہ واری ءَ را بے ترس ءُ بیم ءِ پیلو کنگ ءِ اہل بہ بنت۔