پاکستان ءَ بھارتی سازش ناکام کتگ، اعجاز ملاح نامیں ماہی گیر دزگیر کتگ، وفاقی وزیر ءِ اطلاعات عطا اللہ تارڑ ءِ پریس کانفرنس

اسلام آباد۔1نومبر  (اے پی پی):وفاقی وزیر اھوالکاری ءُ نشریات عطا اللہ تارڑ ءَ گوشت کہ پاکستان ءَ راستی ءِ جنگ ءَ بھارت ءَ را شکست دیگ ءَ پد دژمن ملک ءِ یک دگہ پندل ءِ بے سوب کتگ۔ انٹیلی جنس ایجنسیاں ہندوستان ءِ نیمگ ءَ چہ جوڑ بوتگیں سازش ناکام کتگ ءُ اعجاز ملاح نامیں ماہی گیرے دزگیر کتگ کہ آئی ءَ سنسنی خیزیں انکشاف کتگ۔ شمبے ءِ روچ ءَ تہی کارانی وزیر مملکت طلال چوہدری ءِ گوما پریس کانفرنس ءَ گوں تران کنان ءَ وفاقی وزیر ءِ اھوالکاری ءَ گوشت کہ بھارت جنگ ءِ میدان ءَ وتی شکست ءَ را شموشگ ءِ وس ءَ نہ اِنت ءُ آپریشن سندور ءِ ناکام بوھگ ءَ پد آئی ءَ ردیں ھال ءُ اھوال ءِ گامگیج بندات کتگ۔ آئی ءَ گوشت کہ بھارت ءَ را سفارتی محاذ ءِ سر ءَ وتی بیانیہ ءِ تہ ءَ ھم شکست ءِ دیم ءَ کپتگ۔ جنگ ءِ وھد ءَ سرجمیں ھندی رسانکدر ءَ دروگیں بیانیہ جوڑ کت ءُ وتی دروگیں ھالانی تہ ءَ لاہور ءُ ملتان ءِ بندرگاہ ھم ھلاس بوتگ اَنت اگاں چہ لاہور ءُ ملتان زمینی شھر اَنت کہ اودا بندرگاہ نیست۔ آئی ءَ گوشت کہ انوگیں وھد ءَ مارا یک مزنیں سوبمندی یے رستگ کہ ایشی ءِ تہ ءَ پاکستان ءِ کانود نافذ کنوکیں ادارگاں اعجاز ملاح نامیں ماھیگ گر دزگیر کتگ کہ اے سال ءِ ستمبر ءَ ماہی گیری ءِ واستہ دریا ءَ شتگ ات ءُ انڈین کوسٹ گارڈز ءَ آئی ءَ را دزگیر کتگ ءُ اے دزگیر کنگ ءَ پد ناشناسیں جاھے ءَ دیم داتگ۔ اعجاز ملاح ءَ را زر ءُ دگہ ترغیب دیگ ءُ پاک بحریہ، پاک فوج ءُ سندھ رینجرز ءِ وردی ءَ ھوار دگہ حساسیں چیزانی بھا زورگ ءِ ذمہ واری داتگ ءُ ھندی انٹیلی جنس ادارگاں اعجاز ملاح یلہ داتگ۔ اے پاکستان ءِ ھلاپ ءَ ھندی انٹیلی جنس ایجنسی ءِ دگہ پروپیگنڈا ءِ گامگیج ات۔ آئی ءَ گوشت کہ مئے کانود ءِ نفاذ ءِ ادارگ سک سرگرم انت۔ وھدے کہ اعجاز ملاح اے چیزاں بھا کنگ ءَ بوتگ انت گڑا پاکستانی سیکورٹی ادارہ آئی ءِ پد ءَ کپتگ انت ءُ رند ءَ آئی ءَ دزگیر کتگ۔ آئی ءَ گوشت کہ دزگیر کنگ ءِ وھد ءَ اعجاز ملاح ءِ گور ءَ چہ بازیں چیز برآمد کنگ بوتگ ایشانی تہ ءَ سم کارڈ، ماچ، لائٹر ءُ دگہ ھوار اَنت۔پٹ ءُ پول ءِ ساھت ءَ اے گپ پدر بوتگ کہ ھندی انٹیلی جنس ادارگ ءَ مالی لالچ ءُ زور ءِ وسیلگ ءَ اعجاز ملاح ءَ کارمرد کتگ ءُ ملزم ءَ دزگیر کنگ ءَ پد وتی جرم ءِ منگ بوتگ۔ اے موہ ءِ سر ءَ رسانکدر ءِ دیم ءَ اعجاز ملاح ءِ اعترافی بیان ھم شنگ کنگ بوت کہ آئی ءِ تہ ءَ گْوشگ بوت کہ من ریاض ملا ءِ چُک اعجاز ملاح آں ءُ ٹھٹہ ضلع ءِ نندوک آں ءُ منی لوگ ءِ مردم ماہی گیر ءِ کار ءَ کن آں ۔ اگست 2025 ءَ من ءَ ھندی کوسٹ گارڈز ءَ دزگیر کتگ۔ من ءَ گْوشگ بوت کہ تئی کیس ءِ کارروائی ءَ دو ءُ سئے سال لگت کنت۔ پدا من ءَ گْوشگ بوت کہ اگاں من پہ آھاں کار بہ کن آں گڑا منی یلہ کنگ زوت ممکن اِنت، وھدے کہ زر ءُ انعام ھم لالچ دیگ بوتگ اَنت۔ اعجاز ملاح ءَ گْوشتگ کہ پد ءَ من ءَ یلہ داتگ ءُ ھدایت کنگ بوتگ کہ من نیوی، رینجرز ءُ آرمی ءِ وردی، سئے زونگ سم کارڈ، سئے موبائل دکانانی بل، پاکستانی ماچ ءُ سگریٹ ءِ ڈبہ، لائٹر، ءُ کوھنیں 100 ءُ 50 کلدار ءِ نوٹاں بہ دئے آں. وھدے کہ من سامان جم کت ءُ اکتوبر ءَ دریا ءِ کش ءَ واتر بوھگ ءِ ھاترا رھادگ بوتاں گڑا من دزگیر کنگ بوتاں۔ اعجاز ملاح ءَ گشتگ کہ منی گوں ہندوستان ءِ انٹیلی جنس افسر اشوک کمار ءَ رابطہ بوتگ کہ آئی ءَ سامان ءُ عکس دیم داتگ انت۔ وفاقی وزیر ءِ اھوالکاری ءَ گوشت کہ درستیں شواہد است انت، فرانزک تجزیہ ءِ تہ ءَ وائس نوٹ ھم دیم ءَ اتکگ انت۔ اعجاز ملاح سُھمک دست ءَ گپت، آ اے سامان ءَ ہندوستان ءَ برگ ءَ ات۔ مئے کرّا آئی ءَ را داتگیں زرّانی ھال ھم ھست اَنت۔ اے معاملہ نہ ایوک ءَ رسانکدر ءَ بلکیں درئی کارانی کارگس ءِ وسیلگ ءَ میاں اوستمانی دیواناں ھم گوں زور ءَ چست کنگ بیت دانکہ بھارت ءِ سازش ءِ پدر کنگ بہ بیت۔ آئی ءَ گوشت کہ بھارت ءِ پروپیگنڈا جنگ ءَ اوگانستان ھم ھوار انت، وھدیکہ روکپتی سیم سر ءَ چہ اُرش کنگ بوتگ گڈا اوگانستان ءِ دری کارانی وزیر نئی دہلی ءَ نشتگ ات۔ آئی ءَ گوشت کہ نوں اوگانستان ھم ھندوستان ءَ چہ دربرگ ءَ اِنت کہ پروپیگنڈا جنگ چون کنگ بہ بیت، آ ھندوستان ءَ رو اَنت ءُ کشمیر ءِ سر ءَ تبصرہ کن اَنت، بلے آھانی جند ءِ بستار چے اِنت، آ نہ سئیں ءِ تہ ءَ اَنت ءُ نہ کہ سیزدہ ءِ تہ ءَ ءُ نہ کہ گلوبل لیول ءَ کسے ءِ نمائندگی کن اَنت۔آئی ءَ گوشت کہ مئے فورسز ءَ چہ ما چار رند ءَ مزنیں دژمن ءَ را شکست داتگ، ما اوگان پناہ گزین آناں وتی ھرچ ءُ درچ ءَ ادا داشتگ، آھانی گوما گامگیجانداری کتگ۔ وفاقی وزیر انفارمیشن ءَ گوشت کہ آزاد کشمیر ءِ بیلا نور شاہ ءِ دمگ ءِ بابت ءَ گشگ بوتگ کہ ادا ناشرکار آنی تربیتی کیمپ است انت ءُ ھما روچ ءَ کہ بھارت ءَ پاکستان ءِ سر ءَ اُرش کتگ گڑا ما میڈیا ءِ نمائندگ آنی گوما مریدکے ءُ بہاول پور ءَ روگی اتیں، پمیشکا بھارت ءَ اے جاگہ ​​آناں نشانگ جوڑ کتگ پرچا کہ آ ترسگ ءَ اتنت کہ ما اودا ھرکس ءَ را اُرش کن ایں ءُ آھانی سرجمیں منصوبگ نہ بیت۔ یک جستے ءِ پسو ءَ آئی ءَ گشتگ کہ اعجاز ملاح ہندوستان ءِ نیمگ ءَ روگ ءِ وہد ءَ چہ دریا ءَ دزگیر کنگ بوتگ، ثبوت جم کنگ ءِ ھاتر ءَ آئی ءَ را لال دست ءَ گرگ سک المی انت۔ آئی ءَ گوشت کہ کانود ءِ نفاذ ءِ ادارہ ملزم ءَ را باز رند ءَ نگرانی ءِ چیر ءَ دار انت تانکہ آئی ءِ اصل نیت زانگ بہ بیت ءُ آ ھما جاہ ءَ دزگیر کنگ بہ بیت۔ دگہ جُستے ءِ سر ءَ آئی ءَ گوشت کہ ڈی جی آئی ایس پی آر ءُ وزارت ءِ اھوالکاری پروپیگنڈا جنگ ءِ ھلاپ ءَ جنگ ءَ یکجا اَنت، ایشی ءِ سر ءَ دگہ ھیال نیست۔ وفاقی وزیر ءَ گوشت کہ اوگانستان ءِ پروپیگنڈا ءَ چہ پاکستان ءِ جان سلامتی ءَ ھچ وڑیں فرق نہ بیت۔ آئی ءَ گوشت کہ ترکی ءِ درئی کارانی کارگس ءِ بیان سک جْوان انت ۔ اوگانستان ءِ زمہ واری انت کہ آ اے گپ ءَ دل یکیمی بہ کنت کہ آئی ءِ سرڈگار خوارج ءُ ھندوستانی جدائی لوٹوکیں گلانی نیمگ ءَ پاکستان ءِ ھلاپ ءَ ناشرکاری ءِ واستا کارمرد کنگ مہ بیت۔ یک جستے ءِ پسو ءَ آئی ءَ گوشت کہ سلاہ بندیں اُرد دائم ءَ ساڑی اَنت، خوارج جدائی لوٹوک ءُ ھندوستانی جدائی لوٹوک پچلگ کنگ بیگ ءَ اَنت، ناشرکار دزگیر کنگ بیگ ءَ اَنت، ناشرکاری ءِ ھلاسی ءِ واستہ پاکستانی راج، سرکار ءُ سلاہ بندیں اُرد سرجمی ءَ یکجاہ ءُ سرگرم اَنت۔ ان شا اللہ ناشرکاری ہلاس بیت ۔ دگہ جُستے ءِ سر ءَ آئی ءَ گوشت کہ پی ٹی اے سم آنی بابت ءَ رھبند ھست اَنت، سم آنی تصدیق کنگ بیت، بائیومیٹرک ءِ ھست نہ بوھگ ءَ ھچ سم دست نہ کپ اِیت۔ آئی ءَ گوشت کہ پاکستانی سلاہ بندیں اُرد کجام ھم جاور ھال ءَ گوں گر ءُ چیل بوھگ ءِ واستہ دائم ءَ ساڑی انت۔ آپریشن سندور ءَ دژمن ءَ شکست داتگ پمیشکا آ پروپیگنڈا جنگ ءَ اَنت ایشی ءِ تہا ہم شکست دیگ بنت۔