بلوچستان ءِ سر وزیر میر سرفراز بگٹی ءَ سیکرٹری کمیٹی ءِ دیوان ءِ سروکی کت، محکمہ ءِ کارکردگی چار ءُ تپاس

کوئٹہ۔ 31 اکتوبر (اے پی پی): بلوچستان ءِ سر وزیر میر سرفراز بگٹی ءِ سروکی ءَ سیکرٹری کمیٹی ءِ مزن تک ءِ دیوان برجم دارگ بوت ایشی ءِ تہ ءَ صوبائی محکمہ آنی سہ ماہی کارکردگی رپوٹ پیش کنگ بوت۔ چیف سیکرٹری بلوچستان شکیل قادر خان ءَ دیوان ءَ سرجمیں بریفنگ دات ایشی ءِ تہ ءَ گوشگ بوت 644 جتا جتائیں پیرامیٹرز ءِ سر ءَ 38محکمہ آنی کارکردگی ءِ چار ءُ تپاسی کنگ بوتگ۔ بریفنگ ءِ رد ءَ کارکردگی ءِ رد ءَ لائیو سٹاک ءِ محکمہ اولی رند ءَ بوتگ، مالیات ءِ محکمہ دومی رند ءَ شہری منصوبہ بندی ءُ دیمروئی ءِ محکمہ سیمی رند ءَ بوتگ۔ شعبہ قانود چارمی ءُ شعبہ زراعت پنچمی نمبر ءَ اتکگ۔ کارکردگی ءِ رد ءَ نزور تریں محکمہ آنی تہ ءَ بنجاھی حکومت ءِ محکمہ اولی ، زالبول آنی دیمروئی دومی ءُ بین صوبائی ھمگرنچی سیمی بوتگ۔ لیبر ءُ مین پاور چارمی نمبر ءَ انت وھدے کہ سی ایم آئی ٹی پنچمی نمبر ءَ انت۔ بلوچستان ءِ سر وزیر میر سرفراز بگٹی ءَ مزنیں کارکردگی ءِ سرا محکمہ آنی سروک آناں شگر ءُ منت گپت ءُ نزور کارکردگی ءِ سرا کار کنوکیں محکمہ آنی سیکرٹری آناں ہدایت کت کہ آ وتی کارکردگی ءَ گہتر بہ کن انت۔ بنجاھی وزیر ءَ دیوان ءَ گوں گشتانک دیان ءَ گوشت کہ گڈ گورننس ءِ وسیلگ ءَ راجی جیڈھ آناں کم کم ءَ کم کنگ بوت کنت۔ آئی ءَ گوشت کہ بلوچستان ءَ جیڈھ آنی دلدل ءَ چہ درکپگ ءِ واستہ محنتی، ایمانداری ءُ برجمی ءَ کار کنگی اِنت۔ میر سرفراز بگٹی ءَ ہدایت کت کہ توامیں محکمہ سروس ڈیلیوری، پیسلہ کنگ ءُ انتظامی معاملہ آں شفافیت ءَ را دل یکیمی بہ کن انت۔ آئی ءَ گوشت کہ صوبہ ءِ جیڈھ آناں ڈن ءَ چہ کس گیش ءُ گیوار نہ کنت، زمہ واری مارا وت زورگ لوٹ ایت۔ بنجاھی وزیر ءَ گوشت کہ دیمروئی منصوبگ آنی تہ ءَ ترندی ءَ را گیش کنگ بہ بیت ءُ الس آناں زوت ریلیف پجاری کنگ بہ بیت تانکہ الس ءِ دلجمی گیش مھکم بہ بیت۔ آئی ءَ گوشت کہ بلوچستان ءِ دیمروئی ایوک ءَ گڈ گورننس ءُ پالیسی آنی جوانی ءَ عمل کنگ ءَ چہ ممکن انت۔ دیوان ءِ بندات ءَ بھگنادی ءَ ناشرکارانی گوما دیم پہ دیم بوھگ ءِ وھد ءَ شھید بوتگیں ایس ایچ او لطف علی کھوسہ ءِ ابدی امن ءُ مزنیں رند ءِ واستہ دعا ھم کنگ بوت۔