میاں ریاض حسین پیرزادہ ءِ گشگ انت کہ حکومت ءَ ہاؤسنگ ءِ بحران ءِ سرا غلبہ حاصل کنگ ءِ ھاتر ءَ پائیدار دیمروئی ، نوکیں پالیسی ءُ سرکاری ءُ نجی شراکت داری ءِ دیمروئی ءِ ھاتر ءَ جزم

اسلام آباد۔30اکتوبر  (اے پی پی): وفاقی وزیر برائے ہاؤسنگ اینڈ ورکس میاں  ریاض حسین پیرزادہ ءَ گوشت کہ پاکستان ءَ گیش بوھوکیں ہاؤسنگ بحران ءَ چہ گر ءُ چیل بوھگ ءِ واستہ حکومت پائیدار دیمروئی، نوکیں پالیشی ءُ سرکاری ءُ نجی شریکداری ءِ دیمروئی ءِ واستہ جزم انت۔ ملک ءَ 10 ملین ءَ چہ گیش لوگ آنی کمی یک مزنیں چیلنج ءِ اِنت کہ ایشی ءِ گیواری یکجاھیں پالیسی سازی، ھاوسنگ فنانس ءِ تہ ءَ گیشی ءُ جامع منصوبگ بندی ءِ تہ ءَ اِنت۔ ترجمان ءِ رد ءَ وفاقی وزیر ءَ اے گپ لاہور ایکسپو سینٹر ءَ برجم داشتگیں سئے روچی میاں اوستمانی تعمیراتی صنعت ءِ نمائش ءُ کانفرنس ’’پاکستان ءَ را جوڑ کن اِت 2025 – بیا اِت یکجائی ءَ جوڑ کن ایں‘‘ ءِ بنگیج ءِ موہ ءَ کت۔ اے مراگش وزارت ہاؤسنگ اینڈ ورکس ءُ فیکٹ ایکسبیشنز پرائیویٹ لمیٹڈ ءِ نیمگ ءَ یکجائی ءَ برجم دارگ بوتگ ات ایشی ءِ مول ءُ مراد ایش ات کہ پاکستان ءَ پائیدار ہاؤسنگ حل، شہری دیمروئی ءُ سمارٹ کنسٹرکشن ءِ آیوکیں وھد ءِ سر ءَ گپ ءُ تران کنگ ءِ ھاترا تعمیراتی صنعت ءِ رہشون، ماہرین، سرمایہ کار ءُ پالیسی سازاں یک پلیٹ فارم ءِ سر ءَ یکجاہ کنگ بہ بیت۔ افتتاحی مراگش ءَ وفاقی وزیر ءَ ربن ءِ کٹگ ءَ چہ ایونٹ ءِ باقاعدہ بندات کت ءُ نوکیں تعمیراتی ٹیکنالوجی، پائیدار مواد ءُ کم لاگت ءِ ہاؤسنگ ءِ حل پیش کنوکیں اسٹیک ہولڈر آنی گوما رابطہ کنگ ءِ واستہ جتا جتائیں اسٹال آنی تر ءُ تاب کت۔ میان ریاض حسین پیرزادہ ءَ وتی گشتانک ءِ تہ ءَ گوشت کہ حکومت ہاؤسنگ فنانس ءِ دیمروئی، شریکداری ءِ موہ آناں گیش کنگ ءُ السی لوٹ آنی رد ءَ ھواریں پالیشی جوڑ کنگ ءِ واستہ ٹھوس گامگیج کنگ ءَ انت۔ راجی ہاؤسنگ پالیسی 2025ءِ مستریں نکات آناں پیش کنان ءَ آئی ءَ گوشت کہ اے پالیسی ءَ ہاؤسنگ فنانس ءِ اصلاحات، توانائی ءِ کارآمدیں ڈیزائن ءُ شعبہ جات ءِ ھمگرنچی ءَ را دیمروئی ءِ مستریں ستون ءِ رنگ ءَ جار جتگ۔ اے مراگش ءِ تہ ءَ بھر زوروکیں نامداریں مردم آنی تہ ءَ سی ای او فیکٹ نمائش سلیم خان تنولی، پیسریگیں وفاقی سیکرٹری ہاؤسنگ ءُ ڈی جی والڈ سٹی لاہور اتھارٹی کامران لاشاری، شہری دیمروئی ءِ ماہر ندیم خورشید ءُ NUML یونیورسٹی ءِ پرو ریکٹر پروفیسر ڈاکٹر صفیر اعوان ھوار اتنت۔ کانفرنس ءِ اولی روچ ءَ شہری منصوبہ بندی ءُ تعمیراتی شوبگ ءِ ماہرین ءَ پائیدار شہری دیمروئی، سمارٹ سبز تعمیراتی ءُ چاگردی ءُ اقتصادی ہم آہنگی ءِ وڑیں سرھال آنی سر ءَ پینل ڈسکشن ءَ بہر زرتگ۔ ماہرین ءَ ہاؤسنگ ءُ تعمیراتی شوبگ ءَ ٹیکنالوجی ءِ جوانیں رنگ ءَ کارمردی، سبزیں بنیاتی ڈھانچہ ءُ پائیدار سرمایہ کاری ءِ ھوالگ ءَ وتی سفارش پیش کتگ۔ وفاقی وزیر ءَ سرمایہ کار، ڈویلپر، مالیاتی ادارگ، ٹیکنالوجی ءِ ماہرین ءُ اکیڈمک آناں حکومت ءِ وژن ءِ رد ءَ پائیدار ءُ کار ءِ لائکیں گیواری ءِ واستہ یکجائی کوشست کنگ ءِ دعوت دات۔ آئی ءَ گوشت کہ ’’بلڈ پاکستان 2025‘‘ پلیٹ فارم ءَ چہ زانت ءُ مٹ ءُ بدلی، ٹیکنالوجی ءِ دیمروئی ءُ شریکداری ءِ دیمروئی ءِ واستہ مزنیں موہ ءِ پجاری بیت۔ اے سئے روچی نمائش ءُ کانفرنس یکم نومبر 2025 ءَ تاں برجاہ بیت کہ ایشی ءِ تہ ءَ تکنیکی سیشن، نیٹ ورکنگ ءُ تعمیراتی صنعت ءَ گوں سیادی داروکیں کار ھوار اَنت۔