کینیڈا ءِ ہائی کمشنر ءَ وفاقی وزیر برائے تجارت جام کمال خان ءَ گوں گند ءُ نند کت، دو نیمگی تجارت ءُ سرمایہ کاری کمک ءَ را مھکم کنگ ءِ بابت ءَ گپ ءُ تران

اسلام آباد۔30اکتوبر  (اے پی پی): وفاقی وزیر تجارت جام کمال خان ءَ پاکستان ءِ واستہ کینیڈا ءِ ہائی کمشنر طارق علی خان ءَ گوں پنچ شمبے ءِ روچ ءَ وزارت تجارت ءَ گند ءُ نند کت۔ گند ءُ نند ءَ پاکستان ءُ کینیڈا ءِ نیام ءَ دو نیمگی تجارتی ءُ سرمایہ کاری کمک ءَ را مھکم کنگ ءِ سر ءَ ھیال ریچی کنگ بوت، ھاسیں رنگ ءَ کان کنی، کشت ءُ کشار، انفارمیشن ٹیکنالوجی، قابل تجدید توان ءِ شوبگ ءَ کمک ءَ را گیش کنگ ءِ سر ءَ ھیال ریچی کنگ بوت۔ کینیڈا ءِ ہائی کمشنر ءَ وزیر تجارت ءَ را سرجمیں ایشیا ءَ تجارتی مارکیٹ آناں تنوع ءِ واستہ کینیڈا ءِ کوشست آنی بابت ءَ سرپد کت ءُ پاکستان ءَ را کینیڈا ءِ برآمدات ءِ واستہ کینولا آئل، سویابین ءُ دال آنی واستہ یک ھاسیں ابھریں مارکیٹ ءِ رنگ ءَ پدر کت۔ آئی ءَ گوشت کہ کینیڈا آیوکیں ماھ آنی تہ ءَ سئے مزنیں ایکسپو ءِ برجم دارگ بیت، مارچ ءَ پی ڈی اے سی کنونشن (کان کنی ءِ شوبگ)، اپریل ءَ کراپس کینیڈا شو (زرعی شوبگ) ءُ ٹورنٹو ءَ اتحاد (آئی ٹی ءُ ٹیک شوبگ) ءِ برجم دارگ بیت۔ ہائی کمشنر ءَ اے نمائش آنی تہ ءَ پاکستان ءِ بھر زوری ءِ واستہ دلبڈی دات تانکہ شریکداری ءِ شوھازگ ءُ کاروباری رابطہ آناں جوڑ کنگ بہ بیت۔ وفاقی وزیر جام کمال خان ءَ گوشت کہ پاکستان حلال گوشت ءِ پیداوار، وردن، لائیو سٹاک ءُ سرٹیفائیڈ پروڈکٹ آنی تہ ءَ ویلیو ایڈیشن ءِ سر ءَ دلگوشی دیگ ءَ انت۔ آئی ءَ کینیڈا ءِ کمپنی آناں 25نومبر ءَ کراچی ءَ برجم دارگ بوھوکیں پاکستان فوڈ اینڈ ایگریکلچر ایکسپو 2025 ءَ بھر زوری ءِ دعوت دات کہ ایشی ءِ تہ ءَ پاکستان ءِ کشت ءُ کشاری ءُ پروسیسڈ فوڈ ءِ توانائی ءِ درشان کنگ بوھگ ءَ اِنت۔ وفاقی وزیر ءَ ڈیجیٹل ٹرانسفارمیشن، ای کامرس، آئی ٹی برآمدات ءُ اے آئی ءِ سر ءَ بنیات ءِ سر ءَ فن ٹیک اسٹارٹ اپس ءِ تہ ءَ پاکستان ءِ ترندیں پیشرفت ءِ سر ءَ گیش زور پر دات۔ آئی ءَ گوشت کہ میٹا ءُ گوگل ءِ وڑیں گلوبل ٹیک فرم آنی گوما کمک ءَ پاکستان ءِ ڈیجیٹل ایکوسسٹم ءَ را گیش ءُ گیوار کتگ۔ دوئیں نیمگاں قابل تجدید توانائی ءِ منصوبگ، ایس ایم ای ءِ دیمروئی ءُ انسانی وسائل ءِ تبادلہ ءِ پروگرام آنی تہ ءَ کمک ءِ شوھازگ ءِ تہ ءَ سک باز دلگوشی ءِ درشانی کت، ھمے وھد ءَ پاکستان ءِ ہنرمندیں کارندہ آنی ارزشت ءَ را ھم جھان ءِ مارکیٹ آنی واستہ منگ بوت۔ کینیڈا ءِ ہائی کمشنر ءَ پاکستان ءِ تجارتی دوستیں پالیشی ءُ گیش بوھوکیں صنعتی توانائی آناں ساڑات۔ آئی ءَ کینیڈا ءَ 3لکھ ءَ چہ گیش پاکستانی مھکمیں آبادی ءِ ھم ھال دات کہ ایشی ءِ تہ ءَ کینیڈا ءِ پارلیمنٹ ءَ گچین بوتگیں نمائندگ ھم ھوار اَنت ءُ مھکمیں ادارگی ءُ کاروباری سیادی ءِ جوڑ کنگ ءِ ھاترا گامگیج آنی حمایت کت۔ دیوان ءِ گڈسرا دوئیں نیمگاں اقتصادی سیادی ءَ را گیش گہتر کنگ، یکجائی منصوبگ آناں دیمروئی دیگ ءُ دوئیں ملک آنی تہ ءَ تجارتی میلے ءُ شعبہ ءَ گوں سیادی داروکیں مراگش آنی تہ ءَ بھر زوری ءِ واستہ وتی عزم ءِ پدر کنگ بوت۔